ОАВ: Оқ уй вакиллари CNN телеканали эфирига чиқишдан бош тортди

Оқ уй вакиллари CNN телеканалидаги дастурларда иштирок этмайди. Бу ҳақда Politico АҚШ президенти Дональд Трамп маъмуриятидаги мансабдорга таяниб хабар берди, деб ёзади «РБК».

Нашр таъкидлашича, маъмурият ходимлари аввалгидек, телеканал мухбирлари саволларига жавоб беришда давом этмоқда, аммо Оқ уй матбуот котиби Шон Спайсер ва Трампнинг маслаҳатчиси Келлиэнн Конуэй сўнгги вақтларда ҳақиқатан ҳам CNN эфирларида чиқмаган.

CNN мухбирларидан бири янги маъмурият шу тариқа телеканални «жазолаш»га ва унинг рейтингини пасайтиришга уринаётганини айтди. Шон Спайсер, ўз навбатида, телеканалнинг Оқ уй томонидан бойкот қилингани ҳақидаги тахминларни рад этди.

11 январь куни CNN ўз манбаларига таяниб, Россияда Трампни обрўсизлантирувчи материаллар бўлиши мумкинлиги ҳақида ёзган эди. Телеканал ушбу маълумотни Британия разведкасининг собиқ ходимидан олганини ёзганди. Эртаси куни сайланган АҚШ президенти сифатидаги илк матбуот анжуманида Трамп CNN мухбири саволини эшитишдан бош тортган ва телеканални «сохта хабарлар тарқатувчи» деб атаган эди.