Davlat bojxona qo‘mitasida tashqi iqtisodiy faoliyat ishtirokchilari va OAV vakillari ishtirokida ochiq hay’at majlisi bo‘lib o‘tdi. Unda O‘zbekiston Respublikasining “Davlat hokimiyati va boshqaruvi organlari faoliyatining ochiqligi” to‘g‘risidagi Qonuni doirasida bojxona organlarida amalga oshirilayotgan chora-tadbirlar haqida axborotlar berildi. Bu haqda “Daryo”ga qo‘mita axborot xizmati ma’lum qildi.
Tadbir doirasida O‘zbekiston Respublikasida unifikatsiyalashtirilgan “Yagona oyna” bojxona axborot tizimining taqdimot marosimi ham bo‘lib o‘tdi.
“Unifikatsiyalashtirilgan ‘Yagona oyna’ bojxona axborot tizimini joriy etish yo‘li bilan bojxona xizmatini modernizatsiya qilish” loyihasini amaliyotga joriy etish ishlari 2014-yilda, O‘zbekiston Respublikasi va Janubiy Koreya respublikasi hukumatlari o‘rtasida ikki tomonlama bitim imzolanganidan so‘ng boshlangandi. Uni amalga oshirish uchun Janubiy Koreya tomonidan 5,5 million AQSh dollari miqdorida grant mablag‘i ajratildi.
Loyihani ishlab chiqish va to‘liq amaliyotga joriy qilish mahalliy va Koreya Respublikasining yuqori malakali mutaxassislari bilan hamkorlikda belgilangan muddatda, ya’ni 2014—2016-yillar davomida to‘la amalga oshirildi.
Joriy etilayotgan “Yagona oyna” tizimi tashqi iqtisodiy faoliyat ishtirokchilari tomonidan eksport va import tovarlarini bojxona rasmiylashtiruvidan o‘tkazish uchun bojxona organiga taqdim etilishi lozim bo‘lgan barcha ruxsatnoma sertifikatlari va xulosalarini yig‘ish jarayonini tezlashtirish va bu ishlarga sarflanadigan vaqtni qisqartirish bilan mamlakatda tadbirkorlik muhitini rivojlantirishga ijobiy ta’sir ko‘rsatadi.
Axborot texnologiyalari va kommunikatsiyalarini rivojlantirish vazirligi, Tashqi iqtisodiy aloqalar, Investitsiyalar va savdo vazirligi, Qishloq va suv xo‘jaligi vazirligi, Sog‘liqni saqlash vazirligi, Tabiatni muhofaza qilish davlat qo‘mitasi, “O‘zstandart” agentligi kabi qator vazirlik va idoralarni qamrab olgan mazkur tizim yordamida 20 dan ortiq ruxsatnoma hujjatlari, shu jumladan, muvofiqlik sertifikati, ekologik sertifikat, veterinar guvohnoma va boshqa shu kabi hujjatlarni olish mumkin.
“Yagona oyna” axborot tizimi esa davlat bojxona xizmati organlarida tovarning kelib chiqish sertifikatini, veterinariya, fitosanitariya, ekologik, sanitariya-epidemiologik xulosalarni rasmiylashtirishda tadbirkorlik subyektlariga ruxsat beruvchi tartib-taomillardan o‘tish jarayonini interaktiv kuzatish imkonini beradi.
Ushbu tizimning ishga tushirilishi davlat organlariga mavjud resurslardan unumli foydalanish, turli bojxona to‘lovlari, soliq va yig‘imlarni to‘liq hisoblash va undirish, tadbirkorlarning faoliyatiga aralashmasdan turib, tashqi iqtisodiy jarayonlarni monitoringi va tahlilini olib borish imkonini beradi.
“Yagona oyna” axborot tizimi www.sw.customs.uz manzilida sinov tarzida ishga tushirildi.
Taqdimot marosimida Koreya Respublikasining O‘zbekistondagi Favqulodda va muxtor elchisi Kvon Yong Vu ishtirok etdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)