Давлат божхона қўмитасида ташқи иқтисодий фаолият иштирокчилари ва ОАВ вакиллари иштирокида очиқ ҳайъат мажлиси бўлиб ўтди. Унда Ўзбекистон Республикасининг «Давлат ҳокимияти ва бошқаруви органлари фаолиятининг очиқлиги» тўғрисидаги Қонуни доирасида божхона органларида амалга оширилаётган чора-тадбирлар ҳақида ахборотлар берилди. Бу ҳақда «Дарё»га қўмита ахборот хизмати маълум қилди.
Тадбир доирасида Ўзбекистон Республикасида унификациялаштирилган «Ягона ойна» божхона ахборот тизимининг тақдимот маросими ҳам бўлиб ўтди.
«Унификациялаштирилган ‘Ягона ойна’ божхона ахборот тизимини жорий этиш йўли билан божхона хизматини модернизация қилиш» лойиҳасини амалиётга жорий этиш ишлари 2014 йилда, Ўзбекистон Республикаси ва Жанубий Корея республикаси ҳукуматлари ўртасида икки томонлама битим имзоланганидан сўнг бошланганди. Уни амалга ошириш учун Жанубий Корея томонидан 5,5 миллион АҚШ доллари миқдорида грант маблағи ажратилди.
Лойиҳани ишлаб чиқиш ва тўлиқ амалиётга жорий қилиш маҳаллий ва Корея Республикасининг юқори малакали мутахассислари билан ҳамкорликда белгиланган муддатда, яъни 2014—2016 йиллар давомида тўла амалга оширилди.
Жорий этилаётган «Ягона ойна» тизими ташқи иқтисодий фаолият иштирокчилари томонидан экспорт ва импорт товарларини божхона расмийлаштирувидан ўтказиш учун божхона органига тақдим этилиши лозим бўлган барча рухсатнома сертификатлари ва хулосаларини йиғиш жараёнини тезлаштириш ва бу ишларга сарфланадиган вақтни қисқартириш билан мамлакатда тадбиркорлик муҳитини ривожлантиришга ижобий таъсир кўрсатади.
Ахборот технологиялари ва коммуникацияларини ривожлантириш вазирлиги, Ташқи иқтисодий алоқалар, Инвестициялар ва савдо вазирлиги, Қишлоқ ва сув хўжалиги вазирлиги, Соғлиқни сақлаш вазирлиги, Табиатни муҳофаза қилиш давлат қўмитаси, «Ўзстандарт» агентлиги каби қатор вазирлик ва идораларни қамраб олган мазкур тизим ёрдамида 20 дан ортиқ рухсатнома ҳужжатлари, шу жумладан, мувофиқлик сертификати, экологик сертификат, ветеринар гувоҳнома ва бошқа шу каби ҳужжатларни олиш мумкин.
«Ягона ойна» ахборот тизими эса давлат божхона хизмати органларида товарнинг келиб чиқиш сертификатини, ветеринария, фитосанитария, экологик, санитария-эпидемиологик хулосаларни расмийлаштиришда тадбиркорлик субъектларига рухсат берувчи тартиб-таомиллардан ўтиш жараёнини интерактив кузатиш имконини беради.
Ушбу тизимнинг ишга туширилиши давлат органларига мавжуд ресурслардан унумли фойдаланиш, турли божхона тўловлари, солиқ ва йиғимларни тўлиқ ҳисоблаш ва ундириш, тадбиркорларнинг фаолиятига аралашмасдан туриб, ташқи иқтисодий жараёнларни мониторинги ва таҳлилини олиб бориш имконини беради.
«Ягона ойна» ахборот тизими www.sw.customs.uz манзилида синов тарзида ишга туширилди.
Тақдимот маросимида Корея Республикасининг Ўзбекистондаги Фавқулодда ва мухтор элчиси Квон Ёнг Ву иштирок этди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)