“Buxoro” futbol klubi O‘zbekiston Oliy ligasining 2016-yilgi mavsumini 4-o‘rinda yakunlab, muxlis to‘plash borasida eng yaxshi natijani qayd etgandi. “Championat.asia” nashri ma’lumotiga ko‘ra, klubning 2017-yildagi xarajatlari nisbatan kamroq bo‘ladi.
Nashr bunda 2016-yil hisobidan qarzlar to‘planib qolgani haqida aytgan. Shu qarzlarni to‘lash asnosida klubning yangi mavsum uchun xarajatlari qisqartiriladi. “Buxoro” asosan mahalliy yoshlar xizmatidan foydalanadi.
Avvalroq “Buxoro” futbol klubi o‘z futbolchilaridan qarz bo‘lib qolgani uchun bir qator yetakchi futbolchilar jamoani tark etish arafsida ekani xabar qilingandi. Ayni vaqtga kelib, jamoaning uch asosiy futbolchisi boshqa klublarga o‘tib ketdi. Vadim Chemirtan “Bunyodkor” bilan shartnoma imzolagan bo‘lsa, O‘zbekiston milliy terma jamoasidan taklif olgan Salamat Qutiboyev “Lokomotiv” libosini kiyishga rozi bo‘ldi va “temiryo‘lchilar” bilan 2 yillik shartnomaga imzo chekdi. Maksimilian Fomin esa Ummon klubi safiga borib qo‘shildi.
Ma’lumot uchun, “Buxoro” klubini Oliy ligada kuchli to‘rtlikka olib kirgan mutaxassislar — Tachmurod Agamurodov va Jamshid Saidov iste’foga chiqarildi. 26-yanvar kuni klub matbuot xizmati ularning o‘rni Ulug‘bek Baqoyev va Vadim Abramov bilan to‘ldirilgani haqida xabar berdi.
Izoh (0)