«Бухоро» футбол клуби Ўзбекистон Олий лигасининг 2016 йилги мавсумини 4-ўринда якунлаб, мухлис тўплаш борасида энг яхши натижани қайд этганди. «Championat.asia» нашри маълумотига кўра, клубнинг 2017 йилдаги харажатлари нисбатан камроқ бўлади.
Нашр бунда 2016 йил ҳисобидан қарзлар тўпланиб қолгани ҳақида айтган. Шу қарзларни тўлаш асносида клубнинг янги мавсум учун харажатлари қисқартирилади. «Бухоро» асосан маҳаллий ёшлар хизматидан фойдаланади.
Аввалроқ «Бухоро» футбол клуби ўз футболчиларидан қарз бўлиб қолгани учун бир қатор етакчи футболчилар жамоани тарк этиш арафсида экани хабар қилинганди. Айни вақтга келиб, жамоанинг уч асосий футболчиси бошқа клубларга ўтиб кетди. Вадим Чемиртан «Бунёдкор» билан шартнома имзолаган бўлса, Ўзбекистон миллий терма жамоасидан таклиф олган Саламат Қутибоев «Локомотив» либосини кийишга рози бўлди ва «темирйўлчилар» билан 2 йиллик шартномага имзо чекди. Максимилиан Фомин эса Уммон клуби сафига бориб қўшилди.
Маълумот учун, «Бухоро» клубини Олий лигада кучли тўртликка олиб кирган мутахассислар — Тачмурод Агамуродов ва Жамшид Саидов истеъфога чиқарилди. 26 январь куни клуб матбуот хизмати уларнинг ўрни Улуғбек Бақоев ва Вадим Абрамов билан тўлдирилгани ҳақида хабар берди.
Изоҳ (0)