O‘zbekiston kasaba uyushmalari Federatsiyasi tomonidan Samarqand viloyatida “Xalq bilan muloqot va inson manfaatlari yili” talablarining bajarilishida jamoat tashkilotlari rolini oshirish” mavzuidagi amaliy seminar o‘tkazildi. Bu haqda “Daryo”ga Federatsiya matbuot xizmati ma’lum qildi.
Unga tarmoq va hududiy kasaba uyushma tashkilotlari, Xotin-qizlar qo‘mitasi, “Nuroniy” jamg‘armasi, “Mahalla” xayriya jamoat fondi, “Kamolot” yoshlar ijtimoiy xarakati, Musulmonlar idorasi, Savdo-sanoat palatasi, Ichki ishlar vazirligi, Markaziy bank hamda ushbu tashkilot, muassasalarning hududiy bo‘lim va boshqarmalari rahbar hamda mutasaddilari, OAV vakillari taklif etildi.
Amaliy seminarning birinchi va ikkinchi kunlari ishchi guruhlari Samarqand shahridagi “Cho‘ponota”, “Bunyod”, “Shirin” mahalla fuqarolar yig‘inlari, “Sartepo” mavzesi, Kattaqo‘rg‘on tumanidagi “Mo‘minxo‘ja”, “Zotxon”, “Tugma”, “Qipchoqravot”, “Laylak” mahalla fuqarolar yig‘inlarida joylashgan 1200 dan ortiq xonadonda bo‘lib, oilalarning turmush darajasi, ularda mavjud muammolar, daromadlarni oshirish imkoniyatlari, farzandlar tarbiyasiga salbiy ta’sir etishi mumkin bo‘lgan holatlarning oldini olish masalalarida suhbatlashdi. Shuningek, “Farhod” shaharchasida joylashgan 118-maktabgacha ta’lim muassasasi, 57-umumta’lim maktabi, 6-sonli madaniyat va aholi dam olish markazi, dehqon bozorida bo‘lib, ularda mehnat qilayotgan xodimlar, ota-onalar, aholi vakillari bilan ham muloqotlar o‘tkazildi.
Muloqotlar jarayonida mahallalardagi ijtimoiy himoyatalab, boquvchisini yo‘qotganlar, iqtidorli farzandlari oliy o‘quv yurtlarida to‘lov-shartnoma asosida ta’lim olayotgan oilalar, jismoniy imkoniyati cheklangan fuqarolar, yolg‘iz keksalarga alohida e’tibor qaratildi. Shuningdek, aholining mazkur hududdagi ta’lim, tibbiyot, madaniyat va sport muassasalari, fuqarolarning o‘zini o‘zi boshqarish organlari, bozorlar va aholiga xizmat ko‘rsatish obyektlari, bank muassasalari xizmati haqidagi fikr va mulohazalari ham o‘rganildi.
Aholi bilan tashkil etilgan muloqotlar davomida ishchi guruhlari tomonidan Kattaqo‘rg‘on tumani, “Mo‘minxo‘ja” mahalla fuqarolar yig‘ini hududidagi savdo do‘konlari va xizmat ko‘rsatish shoxobchalarida to‘lov terminallari yetishmasligi, hudud markazida zamonaviy hammom qurish, “Zotxon” qishlog‘ida qo‘shimcha transformator o‘rnatish, ichki yo‘llarni asfaltlash, 4-sonli maktabgacha ta’lim muassasasini zamonaviy talablar asosida qaytadan qurishga ehtiyoj mavjudligi, “Farhod” shaharchasida esa ichimlik suvi ta’minotida va ko‘p qavatli uylar joylashgan ko‘chalarni yoritish borasida muammolar borligi, tor doiradagi shifokorlar xizmatidan foydalanish uchun shaharchadan 8 kilometr uzoqlikda joylashgan poliklinikaga qatnash aholiga qator qiyinchiliklar tug‘dirayotgani, hududdagi Yoshlar sport maydonchasi va ichki yo‘llar ta’mirtalab ekanligi, shaharchadan Samarqand shahriga avtobuslar qatnovi yetarli darajada tashkil etilmagani aniqlandi.
O‘rganishlar yakuniga ko‘ra Kasaba uyushmalari va hamkor jamoat tashkilotlari vakillaridan iborat ishchi guruhlari ushbu muammolar to‘g‘risidagi tahliliy ma’lumotlarni hududlardagi mutasaddilar e’tiboriga havola etib, ularni bartaraf etish bo‘yicha aniq muddatli chora-tadbirlar belgilanishi va ijroga yo‘naltirilishiga erishdi. Tadbirning ahamiyatli jihati shuki, aholi bilan muloqotlar davomida aniqlangan qator muammolar joyida ijobiy hal etildi.
Anjuman yakunida amaliy seminar tavsiyalari qabul qilinib, O‘zbekiston kasaba uyushmalari Federatsiyasi tomonidan dastlabki tajriba sifatida Samarqand viloyatida boshlangan ushbu loyihaning mamlakatning barcha hududlarida ommalashtirish zarurligi, bunda asosiy talab — har bir xonadonga yetib, muammolar mavjud oilalarga amaliy yordam ko‘rsatish ekanligi ta’kidlandi.
Shuningdek, O‘zbekiston kasaba uyushmalari Federatsiyasi, Xotin-qizlar qo‘mitasi, “Nuroniy” jamg‘armasi, “Mahalla” xayriya jamoat fondi, “Kamolot” yoshlar ijtimoiy harakati o‘rtasida xalq bilan muloqotlar orqali oilalardagi ijtimoiy-ma’naviy muhit, turmush darajasi, iqtisodiy ahvolni xolis o‘rganish va yechimini kutayotgan masalalarni aniqlash bo‘yicha hamkorlik Memorandumi imzolandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)