Ўзбекистон касаба уюшмалари Федерацияси томонидан Самарқанд вилоятида «Халқ билан мулоқот ва инсон манфаатлари йили» талабларининг бажарилишида жамоат ташкилотлари ролини ошириш» мавзуидаги амалий семинар ўтказилди. Бу ҳақда «Дарё»га Федерация матбуот хизмати маълум қилди.
Унга тармоқ ва ҳудудий касаба уюшма ташкилотлари, Хотин-қизлар қўмитаси, «Нуроний» жамғармаси, «Маҳалла» хайрия жамоат фонди, «Камолот» ёшлар ижтимоий харакати, Мусулмонлар идораси, Савдо-саноат палатаси, Ички ишлар вазирлиги, Марказий банк ҳамда ушбу ташкилот, муассасаларнинг ҳудудий бўлим ва бошқармалари раҳбар ҳамда мутасаддилари, ОАВ вакиллари таклиф этилди.
Амалий семинарнинг биринчи ва иккинчи кунлари ишчи гуруҳлари Самарқанд шаҳридаги «Чўпонота», «Бунёд», «Ширин» маҳалла фуқаролар йиғинлари, «Сартепо» мавзеси, Каттақўрғон туманидаги «Мўминхўжа», «Зотхон», «Тугма», «Қипчоқравот», «Лайлак» маҳалла фуқаролар йиғинларида жойлашган 1200 дан ортиқ хонадонда бўлиб, оилаларнинг турмуш даражаси, уларда мавжуд муаммолар, даромадларни ошириш имкониятлари, фарзандлар тарбиясига салбий таъсир этиши мумкин бўлган ҳолатларнинг олдини олиш масалаларида суҳбатлашди. Шунингек, «Фарҳод» шаҳарчасида жойлашган 118-мактабгача таълим муассасаси, 57-умумтаълим мактаби, 6-сонли маданият ва аҳоли дам олиш маркази, деҳқон бозорида бўлиб, уларда меҳнат қилаётган ходимлар, ота-оналар, аҳоли вакиллари билан ҳам мулоқотлар ўтказилди.
Мулоқотлар жараёнида маҳаллалардаги ижтимоий ҳимояталаб, боқувчисини йўқотганлар, иқтидорли фарзандлари олий ўқув юртларида тўлов-шартнома асосида таълим олаётган оилалар, жисмоний имконияти чекланган фуқаролар, ёлғиз кексаларга алоҳида эътибор қаратилди. Шунингдек, аҳолининг мазкур ҳудуддаги таълим, тиббиёт, маданият ва спорт муассасалари, фуқароларнинг ўзини ўзи бошқариш органлари, бозорлар ва аҳолига хизмат кўрсатиш объектлари, банк муассасалари хизмати ҳақидаги фикр ва мулоҳазалари ҳам ўрганилди.
Аҳоли билан ташкил этилган мулоқотлар давомида ишчи гуруҳлари томонидан Каттақўрғон тумани, «Мўминхўжа» маҳалла фуқаролар йиғини ҳудудидаги савдо дўконлари ва хизмат кўрсатиш шохобчаларида тўлов терминаллари етишмаслиги, ҳудуд марказида замонавий ҳаммом қуриш, «Зотхон» қишлоғида қўшимча трансформатор ўрнатиш, ички йўлларни асфальтлаш, 4-сонли мактабгача таълим муассасасини замонавий талаблар асосида қайтадан қуришга эҳтиёж мавжудлиги, «Фарҳод» шаҳарчасида эса ичимлик суви таъминотида ва кўп қаватли уйлар жойлашган кўчаларни ёритиш борасида муаммолар борлиги, тор доирадаги шифокорлар хизматидан фойдаланиш учун шаҳарчадан 8 километр узоқликда жойлашган поликлиникага қатнаш аҳолига қатор қийинчиликлар туғдираётгани, ҳудуддаги Ёшлар спорт майдончаси ва ички йўллар таъмирталаб эканлиги, шаҳарчадан Самарқанд шаҳрига автобуслар қатнови етарли даражада ташкил этилмагани аниқланди.
Ўрганишлар якунига кўра Касаба уюшмалари ва ҳамкор жамоат ташкилотлари вакилларидан иборат ишчи гуруҳлари ушбу муаммолар тўғрисидаги таҳлилий маълумотларни ҳудудлардаги мутасаддилар эътиборига ҳавола этиб, уларни бартараф этиш бўйича аниқ муддатли чора-тадбирлар белгиланиши ва ижрога йўналтирилишига эришди. Тадбирнинг аҳамиятли жиҳати шуки, аҳоли билан мулоқотлар давомида аниқланган қатор муаммолар жойида ижобий ҳал этилди.
Анжуман якунида амалий семинар тавсиялари қабул қилиниб, Ўзбекистон касаба уюшмалари Федерацияси томонидан дастлабки тажриба сифатида Самарқанд вилоятида бошланган ушбу лойиҳанинг мамлакатнинг барча ҳудудларида оммалаштириш зарурлиги, бунда асосий талаб — ҳар бир хонадонга етиб, муаммолар мавжуд оилаларга амалий ёрдам кўрсатиш эканлиги таъкидланди.
Шунингдек, Ўзбекистон касаба уюшмалари Федерацияси, Хотин-қизлар қўмитаси, «Нуроний» жамғармаси, «Маҳалла» хайрия жамоат фонди, «Камолот» ёшлар ижтимоий ҳаракати ўртасида халқ билан мулоқотлар орқали оилалардаги ижтимоий-маънавий муҳит, турмуш даражаси, иқтисодий аҳволни холис ўрганиш ва ечимини кутаётган масалаларни аниқлаш бўйича ҳамкорлик Меморандуми имзоланди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)