Turkiya harbiylari va Suriya muxolifatining jangovar bo‘linmalari o‘tgan bir kun davomida “Frot qalqoni” operatsiyasi doirasida IShIDning 65 nafar jangarisini yo‘q qildi. Bu haqda Turkiya Qurolli kuchlari Bosh shtabi tomonidan 23-yanvar, dushanba kuni tarqatilgan bayonotda so‘z boradi, deya xabar bermoqda “TASS”.
“O‘tgan kun davomida o‘tkazilgan operatsiyalar davomida IShIDning 65 a’zosi zararsizlantirilgani aniqlandi. Turkiya harbiy-havo kuchlari El-Bab va Bzagah hududlaridagi 14 ta nishonga zarba berdi. Oltita boshqaruv markazi, yettita yashirin joy, minalashtirilgan avtomobil yo‘q qilindi”, — deya ma’lum qildi turk harbiylari.
Turkiya armiyasi Bosh shtabidan ma’lum qilishlaricha, “xalqaro koalitsiya kuchlari Tadif, Abu Jabbor va Uvashiya hududlarida ham IShID marralarini aniqlagan”. “Uchta jangovar parvoz va dron vositasida berilgan ikkita zarba natijasida tank, qurol-aslaha o‘rnatilgan mashina, uchta transport vositasi va minomyot yo‘q qilindi”, — dedi harbiylar.
Turkiya 2016-yil 24-avgustidan e’tiboran “Suriya ozodlik armiyasi” bilan birgalikda “Frot qalqoni” operatsiyasini boshlagan. Undan ko‘zlangan maqsad — Suriya shimolini IShID va boshqa terrorchi guruhlardan tozalashdir.
So‘nggi ikki oy davomida operatsiya asosiy e’tiborni El-Bab shahri va unga yondosh hududlardan IShIDni siqib chiqarishga qaratgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)