IShID jangarilari Palmiradagi Rim amfiteatrining bir qismini buzib tashladi. Meduza’ning SANA Suriya davlat axborot agentligiga asoslanib yozishicha, mazkur inshoot milodning ikkinchi asrida bunyod etilgan edi.
https://twitter.com/EliotHiggins/status/822370499246206976
Xabar berishlaricha, terrorchilar tomonidan amfiteatrning fasadi, shuningdek, uning oldida turgan Tetrapilon — to‘rtta peshayvonli inshootlar majmuasi buzib tashlangan. Qayd etishlaricha, buzilgan osori-atiqalar shaharning eng asosiy me’moriy yodgorliklaridan biri edi.
IShID 2015-yilning may oyida Palmirani bosib olgan. O‘shanda jangarilar shahardagi bir necha tarixiy yodgorliklarni, xususan, G‘alaba darvozasi, ma’bud Bel ibodatxonasi va Baal-Shamin ibodatxonasini, shuningdek, dafn minoralarini vayron qilgan edi.
2016-yilning 24-mart kuni Suriya qo‘shinlari Rossiya qurolli kuchlari ko‘magida Palmirani egalladi. Palmira ozod qilinganidan so‘ng, Rossiyaning Mariinskiy teatri orkestri dirijyor Valeriy Gergiyev rahbarligida Palmiradagi Rim amfiteatrida konsert bergan, bu tomosha Rossiya telekanallari orqali jonli efirda namoyish etilgan.
Dekabr oyi boshida IShID jangarilari Palmirani yana bosib olib, Suriya hukumat kuchlarini shahardan quvib chiqargani ma’lum bo‘ldi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)