ИШИД жангарилари Пальмирадаги Рим амфитеатрининг бир қисмини бузиб ташлади. Meduza’нинг SANA Сурия давлат ахборот агентлигига асосланиб ёзишича, мазкур иншоот милоднинг иккинчи асрида бунёд этилган эди.
Close up of the recent destruction of the Tetrapylon and Roman Theatre at #Palmyra by ISIS (fixed dates) pic.twitter.com/4w3nUGadCg
— @eliothiggins.bsky.social (@EliotHiggins) January 20, 2017
Хабар беришларича, террорчилар томонидан амфитеатрнинг фасади, шунингдек, унинг олдида турган Тетрапилон — тўртта пешайвонли иншоотлар мажмуаси бузиб ташланган. Қайд этишларича, бузилган осори-атиқалар шаҳарнинг энг асосий меъморий ёдгорликларидан бири эди.
ИШИД 2015 йилнинг май ойида Пальмирани босиб олган. Ўшанда жангарилар шаҳардаги бир неча тарихий ёдгорликларни, хусусан, Ғалаба дарвозаси, маъбуд Бэл ибодатхонаси ва Баал-Шамин ибодатхонасини, шунингдек, дафн минораларини вайрон қилган эди.
2016 йилнинг 24 март куни Сурия қўшинлари Россия қуролли кучлари кўмагида Пальмирани эгаллади. Пальмира озод қилинганидан сўнг, Россиянинг Мариинский театри оркестри дирижёр Валерий Гергиев раҳбарлигида Пальмирадаги Рим амфитеатрида концерт берган, бу томоша Россия телеканаллари орқали жонли эфирда намойиш этилган.
Декабрь ойи бошида ИШИД жангарилари Пальмирани яна босиб олиб, Сурия ҳукумат кучларини шаҳардан қувиб чиқаргани маълум бўлди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)