Туркияда ҳаво ҳароратининг кескин пасайиб кетгани муносабати билан, Истанбул расмийлари шаҳар мушуклари учун оммавий равишда бошпана қуришни бошлади, дея хабар бермоқда «ТАСС».
Истанбулда ҳаво ҳароратининг Цельсий шкаласи бўйича -5 даража совуқгача пасайиши, шаҳарда бир ҳафта давом этган қор бўрони нафақат аҳолининг, балки уларнинг «кичик дўстлари»нинг ҳаётини ҳам қийин аҳволга солиб қўйди. Ташкил этилаётган «мушук уйлари»да жониворларга озиқ-овқат ҳам берилади.
Ҳайвонларни муҳофаза қилиш мавзуси нафақат расмийларни хавотирга солмоқда, балки ижтимоий тармоқларда муҳокама қилинаётган мавзулар рейтингида биринчилардан бўлиб турибди. Истанбул мушуклари совуқда музлаб қолмаслиги ва оч қолмаслиги учун одамлар ҳамма жойда вақтинчалик бошпаналар қуриб, уларга озиқ-овқат келтирмоқда.
«Ҳар бир мавзега — биттадан мушук уйи» ташаббуси билан чиқиш қилган Истанбулнинг Буюкчекмеджа тумани маъмурияти бу борада айниқса фаол иш олиб бормоқда. Маҳаллий маъмурият раҳбари Ҳасан Акгюннинг сўзларига кўра, унга тегишли ҳудудда 5000 дайди мушукка мўлжалланган қабул марказини ишга тушириш режалаштирилган.
Кадикўй туманида эса ҳар йилгидек, анъанавий «Дайди мушуклар фестивали» ўтказилади — у ерда мушуклар учун бошпаналар қурилишига мактаб ўқувчилари жалб қилинади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)