“Titanik” tarixini 30 yil davomida tadqiq etgan britaniyalik jurnalist Shenan Moloni layner halokati bilan bog‘liq yangi taxminni o‘rtaga tashladi, deya xabar bermoqda Meduza. 1,5 mingdan ortiq odamning umriga zomin bo‘lgan halokatga yoqilg‘i omboridagi yong‘in sabab bo‘lgan bo‘lishi mumkin. Molonining ta’kidlashicha, bir necha hafta davom etgan yong‘in oqibatida kemaning zirh qoplamasi qizib ketgan va aynan shu holat aysberg bilan to‘qnashuvning fojiaviy tus olishiga sabab bo‘lgan. Shenan Molonining tadqiqotiga bag‘ishlangan film Yangi yil oqshomida Britaniya televideniyesi orqali namoyish etildi. “Titanik” halokati bilan bog‘liq yangi taxmin haqida The Independent hikoya qiladi.
Zamonasining eng yirik okean layneri hisoblangan “Titanik” 1912-yil 15-aprel kuni – o‘zining ilk qatnovi vaqtida cho‘kib ketgan. Kema Atlantika okeanida muztog‘ga urilgan. Baxtsiz hodisa oqibatida 1,5 mingdan ortiq odam halok bo‘lgan. “Kema xavfli darajada muzlagan suvlarda katta tezlikda harakatlangan va kema ekipaji aysberg bilan to‘qnashuv oldini olishga ulgurmagan” – aynan shu holat kema halokatining rasmiy sababi hisoblanadi.
Britaniyalik jurnalist Shenan Molonining fikricha, “Titanik” halokatiga uning yoqilg‘i omboridagi yong‘in sabab bo‘lgan bo‘lishi mumkin. Molonining ta’kidlashicha, yong‘in kemaning Sautgemptondan yo‘lga chiqishidan ancha oldin yuzaga kelgan – uni bir necha hafta davomida o‘chirishga behuda urinishgan. Bu vaqt ichida kema qoplamasi qizib, o‘z mustahkamligini yo‘qotgan va shu sababli ham aysberg bilan to‘qnashuv vaqtida kema jiddiy zararlangan.
The Independent’ning yozishicha, Moloni “Titanik” halokati sabablarini tadqiq etish davomida, kemaning yo‘lga chiqishgacha olingan fotosuratlarini o‘rganishga muvaffaq bo‘lgan. Qoplamaning ichki, keyinchalik aysberg bilan to‘qnashuv natijasida yorilib ketgan qismida u qorakuya izlarini payqagan. Jurnalist maslahatlashgan mutaxassislar bu izlar, katta ehtimol bilan, “Titanik”ning yoqilg‘i omborlaridan birida yuz bergan yong‘in oqibati bo‘lishi mumkinligini tasdiqlagan.
Molonining aniqlashicha, yong‘in “Titanik” Sautgemptonga kelib, bu yerdan Nyu-York tomon yo‘lga chiqishidan avval boshlangan. Moloni o‘rgangan suratlar kema hali Belfastdagi kemasozlik portida turgan vaqtida olingan. Jurnalistning aniqlik kiritishicha, kema egalari yong‘indan xabardor bo‘lgan va buni yo‘lovchilardan yashirishga uringan: shu sababli ham kema Sautgemptonda qirg‘oqqa boshqa tomoni bilan yaqinlashtirilgan. Zobitlarga esa yong‘in haqida yo‘lovchilarga aytmaslik ko‘rsatmasi berilgan.
Yo‘l davomida 12 kishidan iborat guruh yong‘inni o‘chirishga uringan, biroq buning uddasidan chiqa olmagan. Shenan Molonining qayd etishicha, yong‘in bo‘lgan joyda kema qoplamasi Selsiy bo‘yicha 1000 darajagacha qizigan. Nyu-Yorkka safarning beshinchi kuni “Titanik” aysberg bilan to‘qnashganida, qoplama bunga bardosh bera olmagan va kema bortida katta yoriq paydo bo‘lgan.
Jurnalistning ta’kidlashicha, aysbergni “Titanik” halokatining yagona aybdori sifatida ko‘rsatib bo‘lmaydi: laynerning cho‘kishiga kompleks sabablar, xususan, yong‘in va kema egalarining jinoyatkorona mas’uliyatsizligi sabab bo‘lgan.
“Bu qorakuya izlarini bizgacha hech kim tadqiq etmagan va bu izlar vaziyatni tubdan o‘zgartiradi. Metallurgiya sohasidagi mutaxassislar bunchalik qizdirilgan po‘lat nozik bo‘lib qolishi va mahkamligining 75 foizini yo‘qotishini tasdiqladi”, - deb yozadi The Independent.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)