O‘zbek sportining 2016-yilda yodda qolgan 16 lahzasi

2016-yil o‘zbek sporti uchun omadli bo‘ldi, deb xulosa qilishga asos bor. Birgina yorqin misol — Rio Olimpiadasi.

Yil yakunida “Daryo” muxlislar yodida uzoq vaqt saqlanib qoladigan 16 voqeani eslab o‘tadi.

Jahon chempionati

O‘zbekiston futzal terma jamoasi o‘z tarixida ilk bor jahon chempionatida to‘p surish huquqini qo‘lga kiritdi. Hal qiluvchi o‘yinni ko‘rish uchun “O‘zbekiston” sport majmuasiga tashrif buyurgan muxlislarni sig‘dirish qiyin bo‘lib qolgandi.

“Lokomotiv” — O‘zbekiston chempioni

Toshkentning “Lokomotiv” klubi o‘z tarixida ilk bor mamlakat chempionligini qo‘lga kiritdi. Yilni bemalol temiryo‘lchilar uchun ataldi deyish mumkin. “Afrosiyob” Qarshidan tortib, Buxoroga qadar qadam qo‘ydi. Poyezd qatnovining Qamchiq dovonidan ham o‘tishi esa unutilmas voqelik bo‘ldi. Eng so‘nggida “Lokomotiv” bayramni qo‘shaloq qildi.

Hamisha navqiron Oksana

Oksana Chusovitina ketma-ket yetti Olimpiadada ishtirok etib, Ginnesning rekordlar kitobidan joy oldi. Bugun uni butun dunyoda tan olishadi.

Pochin oltin

O‘zbekiston delegatsiyasining Rio—2016 Olimpiadasidagi ilk oltin medali. Millionlab o‘zbekistonliklar ko‘zini yoshlantirgan kun.

Sinmas iroda

32 nafar sportchi va 31 ta medal. O‘zbekiston paralimpiya terma jamoasining natijasi shunchaki ajoyib. Medal olgan qahramonlarning har biriga Malibu va olimpiyachilarnikidan kam bo‘lmagan mukofot pullari taqdim etildi.

“Qirol o‘ldi...”

Yil faqatgina quvonchli voqealardan iborat emas. Olimpiadalar tarixida O‘zbekiston uchun eng yaxshi natija qayd eta olgan Artur Taymazovning 2008-yildagi oltini bekor qilindi. Pekin Olimpiadasidan 8 yil o‘tib, doping mojarolari sabab sportni tanish qiyin bo‘lib qolishini ko‘pchilik kutmagandi.

“...Yashasin qirol”

2015-yil bu nomni bilganlardan, tanimaganlar ko‘proq edi. Oradan bir yil o‘tib esa, u haqda eshitmagan o‘zbekistonlikni topish qiyin bo‘lib qoldi. Nafaqat O‘zbekistonda, balki dunyoda ham eng yaxshi bokschi deb topilgani yilning eng yaxshi voqealaridan biri bo‘ldi.

Chempionlik zarbasi

Boks bo‘yicha O‘zbekiston terma jamoasi Fazliddin G‘oibnazarovning oltini sabab Rio Olimpiadasining cho‘qqisidan joy oldi. Rossiya, Kuba, Qozog‘iston, Buyuk Britaniya, AQSh, Fransiya kabi mamlakatlardan tashrif buyurgan bokschilar o‘zbekistonliklar soyasida qolgan kun.

Tatimagan g‘alaba

JCh—2018 yo‘lidagi bu o‘yinni tomosha qilish O‘zbekistonning birinchi prezidenti Islom Karimovga nasib qilmadi. Mundialni ko‘rish armon bo‘lib qolgan prezidentini o‘zbekistonlik futbolchilar unutmaydi. G‘alaba goli nishonlanmadi, samoga ishora qilgan qo‘llar faqat o‘sha insonni yodga olayotgandi. Keyinroq bu usul mashhur bo‘lib ketdi va qolgan jamoalarimiz ham golni shu uslubda qarshi olishni afzal bildi.

Otashin bo‘sa

Samvel Babayan g‘alaba bilan yakuniga yetgan o‘yinlardan keyin o‘ziga xos odat chiqardi. Uning maysadan bo‘sa olayotgan siymosi tez orada mashhur bo‘lib ketdi. Biroq Eronga qarshi o‘yindan keyin Babayan nimani o‘pishi kerakligini tushunmay qoldi.

Nazokatli boks

O‘zbekistonlik ayol bokschilarning Olimpiadada ishtirok etishi? Marhamat, Yodgoroy Mirzajonova! Muvaffaqiyat? Olimpiadada ishtirok etishning o‘zi bir baxt. Hozircha...

Mana senga olam, olam gul

Fotima Amilova Rioda barcha turdagi medalga ega chiqdi. 1 ta musobaqaning o‘zida.

Yapon futbolidagi o‘zbekistonlik

Yaponiya Jey Ligasida ham endi o‘zbekistonlik futbolchi bor — Fozil Musayev. Uning yordamida o‘zbek futboli o‘z geografiyasini kengaytirdi.

Olimpiada rekordi

Dunyo og‘ir atletikachilarida endi 1 ta orzu bor: o‘zbekistonlik Ruslan Nuriddinovning rekordini yangilash. Ruslanning o‘zi esa kamida 2020-yilga qadar taxtidan tushmaydi.

Malibu

Malibu’ni O‘zbekiston sportidagi yil avtosi sifatida tan olsa ham bo‘ladi. Rio—2016 Olimpiadasi va Paralimpiadasi qahramonlari bu yil shu mashinada namoyon bo‘la boshladi. Oksana Chusovitinada ham endi shu mashina bor.

Xotima

O‘zbekiston boksi qiroli Ruslan Chagayev 2016-yilga kelib qo‘lqoplarini mixga ildi. Endi uning takrorlanmas janglari faqatgina tarixda qoldi.