“Yulduzlar jangi” kinoepopeyasidagi malika Leya roli bilan tanilgan aktrisa Kerri Fisher 27-dekabr kuni vafot etdi. U 60 yoshda edi, deya xabar bermoqda Meduza.
Aktrisaning o‘limi haqida uning qarindoshlari ma’lum qildi. Bir necha kun avval Fisher yurak xurujidan so‘ng shifoxonaga yotqizilgan edi.
Kerri Fisher “Yulduzlar jangi” kinoepopeyasidagi birinchi filmda (1977-yil) o‘ynagan malika Leya roli bilan shuhrat qozongan. Mazkur filmni tasvirga olish ishlari boshlangan vaqtda u 19 yoshda edi. Keyinchalik Fisher yana to‘rtta “Yulduzlar jangi”da, xususan, VII (2015) va VIII (2017-yilda ekranlarga chiqishi kutilmoqda) epizodlarda ham Leya rolini o‘ynadi.
1990- va 2000-yillarda Fisher Gollivudda “ssenariy shifokori” sifatida ishladi, ya’ni, ssenariylarni qayta ishlash va to‘ldirish bilan shug‘ullandi. Bu lavozimda u “Yulduzlar jangi”ning I – III epizodlari, “O‘ldiruvchi qurol 3”, “To‘ydagi xonanda”, “Mister va missis Smit” filmlarida ishlagan.
Fisher bir necha badiiy va avtobiografik kitoblar muallifidir. Uning so‘nggi, “The Princess Diarist” nomli kitobi 2016-yilda chiqqan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)