«Юлдузлар жанги» киноэпопеясидаги малика Лея роли билан танилган актриса Керри Фишер вафот этди

«Юлдузлар жанги» киноэпопеясидаги малика Лея роли билан танилган актриса Керри Фишер 27 декабрь куни вафот этди. У 60 ёшда эди, дея хабар бермоқда Meduza.

Актрисанинг ўлими ҳақида унинг қариндошлари маълум қилди. Бир неча кун аввал Фишер юрак хуружидан сўнг шифохонага ётқизилган эди.

Керри Фишер «Юлдузлар жанги» киноэпопеясидаги биринчи фильмда (1977 йил) ўйнаган малика Лея роли билан шуҳрат қозонган. Мазкур фильмни тасвирга олиш ишлари бошланган вақтда у 19 ёшда эди. Кейинчалик Фишер яна тўртта «Юлдузлар жанги»да, хусусан, VII (2015) ва VIII (2017 йилда экранларга чиқиши кутилмоқда) эпизодларда ҳам Лея ролини ўйнади.

1990- ва 2000 йилларда Фишер Голливудда «сценарий шифокори» сифатида ишлади, яъни, сценарийларни қайта ишлаш ва тўлдириш билан шуғулланди. Бу лавозимда у «Юлдузлар жанги»нинг I – III эпизодлари, «Ўлдирувчи қурол 3», «Тўйдаги хонанда», «Мистер ва миссис Смит» фильмларида ишлаган.

Фишер бир неча бадиий ва автобиографик китоблар муаллифидир. Унинг сўнгги, «The Princess Diarist» номли китоби 2016 йилда чиққан эди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.