Oʻzbekiston Respublikasi Vazirlar Mahkamasining 2016-yil 4-martdagi 68-sonli “Viloyatlar markazlarida va shaharlardagi tashqi yoritish tizimlarini modernizatsiya qilishga doir qoʻshimcha chora-tadbirlar toʻgʻrisida”gi qaroriga muvofiq, 2016—2019-yillarda tashqi yoritish tizimini modernizatsiya qilish boʻyicha chora-tadbirlar Dasturi tasdiqlandi. Bu haqda Moliya vazirligi rasmiy sayti xabar berdi.
Dastur energiya isteʼmolini yanada kamaytirish, energiya tejamkor texnologiyalar va tizimlarni joriy qilishdagi ustuvor yoʻnalishlarni tashqi yoritish sohasida amalga oshirish va respublika shaharlarining elektr yoritish sxemalarini optimallashtirishni oʻz ichiga olgan.
Bugungi kunda respublikaning 28 ta shahrida (Toshkent shahridan tashqari) moddiy va maʼnan eskirgan hamda energiya isteʼmoli koʻp boʻlgan koʻcha chiroqlaridan foydalanilib kelinmoqda. Dastlabki maʼlumotlarga koʻra 2 779,2 km uzunlikdagi koʻchalarda modernizatsiya qilinishi talab etiladigan 82 883 ta koʻcha chiroqlari mavjud.
Dasturda energiya isteʼmoli koʻp boʻlgan koʻcha chiroqlarini zamonaviy energiya tejamkor svetodiod texnologiyalar bazasidagi yoritish uskunalariga almashtirish orqali respublika shaharlarining tashqi yoritish tizimini 2020-yilgacha modernizatsiya qilish koʻzda tutilgan.
Davlat byudjeti mablagʻlari hisobidan amalga oshiriladigan 28 ta shaharlarning tashqi yoritish tizimini modernizatsiya qilish loyihasining umumiy qiymati 84,8 milliard soʻmni tashkil qiladi (2017-yilda 24 milliard soʻm).
Bundan tashqari Oʻzbekiston Respublikasi Prezidentining 2013-yil 28-noyabrdagi PQ-2078-sonli “Islom taraqqiyot banki ishtirokida “Toshkent shahrining koʻchalarini yoritish tizimiga energiya samaradorligi yuqori boʻlgan texnologiyalarni joriy qilish” loyihasini amalga oshirish boʻyicha chora-tadbirlar toʻgʻrisida”gi qarori qabul qilingan.
Mazkur qarorga muvofiq Toshkent shahar hokimligi (“Toshshaharnur” DUK) tomonidan energiya samaradorligi yuqori boʻlgan texnologiyalarni va elektr energiyadan ratsional foydalanishni joriy qilish orqali shahar koʻchalarining yoritish tizimini takomillashtirish boʻyicha ivestitsion loyiha (2014—2017-yillar) amalga oshirilmoqda.
Dasturlarning amalga oshirilishi mazkur shaharlardagi koʻchalarning tashqi yoritish sifatini yaxshilanishini taʼminlaydi va aholining farovon turmush kechirishi uchun qulay sharoitlar yaratadi, hamda tashqi yoritishda sarflanadigan elektr energiya isteʼmolini yiliga 30 ming kVt ga, shu bilan birga Davlat byudjeti parametrlarida ushbu maqsadlar uchun rejalashtiriladigan byudjet xarajatlarining qisqarishiga erishiladi.
Izoh (0)