O‘zbekistonda 27-dekabrdan transport vositalarini olib qochganlik uchun javobgarlik kuchaytirildi, deb yozadi “Gazeta.uz”. Jinoyat kodeksiga kiritiladigan tuzatishlarni Prezident Shavkat Mirziyoyev imzoladi. Tuzatishlar haqidagi qonun Oliy Majlis Qonunchilik palatasi tomonidan 6-oktabrda qabul qilingan va Senat tomonidan 12-oktabrda tasdiqlangan edi.
Jinoyat kodeksining yangilangan 267-moddasiga muvofiq, transport vositasini o‘g‘irlab ketish endi 5 yildan 10 yilgacha ozodlikdan mahrum etish bilan jazolanadi (bungacha — 3 yildan 5 yilgacha ozodlikni cheklash yoki ozodlikdan mahrum etish).
Xuddi shu jinoyat a) takroran yoki xavfli retsidivist tomonidan, b) shaxslar guruhi tomonidan oldindan til biriktirish orqali, v) zo‘ravonlik bilan yoki zo‘ravonlikni qo‘llagan holda tahdid bilan yoki g) transport vositasini o‘g‘rilik yoki bosqinchilik yo‘li orqali o‘g‘irlash maqsadlarida sodir etilsa, 10 yildan 15 yilgacha muddatga ozodlikdan mahrum etish bilan jazolanadi (bungacha birinchi ikkita band uchun 5 yildan 10 yilgacha ozodlikdan mahrum etish ko‘zda tutilgan edi).
Shunga o‘xshash xatti-harakat a) o‘ta xavfli retsidivist tomonidan, b) uyushgan guruh tomonidan yoki v) transport vositasini bosqinchilik hujumi yo‘li bilan o‘g‘irlash maqsadlarida amalga oshirilsa, 15 yildan 20 yilgacha ozodlikdan mahrum etish bilan jazolanadi (birinchi ikkita band uchun 10 yildan 15 yilgacha ozodlikdan mahrum etish ko‘zda tutilgan edi).
Izoh (0)