O‘zbekiston davlat jahon tillari universitetida O‘zbekiston Qahramoni, O‘zebkiston xalq shoiri Erkin Vohidov tavalludining 80 yilligi munosabati bilan “Shoir va zamon” mavzusida adabiy-badiiy kecha o‘tkazildi. Bu haqda universitet vakillari “Daryo”ga ma’lum qildi.
Tadbirda filologiya fanlari doktori, professor Bahodir Karimov Erkin Vohidovning adabiy-estetik qarashlari, filologiya fanlari doktori, professor Xurshid Do‘stmuhammad shoirning ma’rifati va fazilatlari haqida, filologiya fanlari doktori, dotsent Saydi Umirov esa Erkin Vohidov ijodining yoshlar tarbiyasiga ta’siri haqida chiqishlar qilgan.
Adabiy-badiiy kecha davomida talabalar ishtirokida Erkin Vohidov ijodidan she’riy chiqishlar va sahna ko‘rinishlari namoyish etildi, shoir g‘azallarining chet tillaridagi tarjimalaridan namunalar tinglandi.
Ma’lumot uchun, O‘zbekiston Prezidenti Shavkat Mirziyoyev 7-dekabr kuni Erkin Vohidov tavalludining 80 yilligini nishonlash to‘g‘risidagi qarorni imzolagan edi. Unda shoirning tavalludini mamlakat miqyosida keng nishonlash va xotirasini abadiylashtirish haqida ko‘rsatma berilgan edi.
Hozirda O‘zbekistonning qariyb barcha ta’lim muassasalari va boshqa joylarda Erkin Vohidov tavalludining 80 yilligiga bag‘ishlangan tadbirlar bo‘lib o‘tmoqda. Xususan, avvalroq Yozuvchilar uyushmasida tashkil etilgan xotira tadbiri haqida axborot berilgan edi.
Eslatib o‘tamiz, O‘zbekiston xalq shoiri, O‘zbekiston Qahramoni Erkin Vohidov 2016-yil 30-may kuni uzoq xastalikdan so‘ng vafot etgan edi. U 1936-yil 28-dekabr kuni Farg‘ona viloyatining Oltiariq tumanida tug‘ilgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)