Ispaniyaning “Barselona” futbol klubi rahbariyati jamoa hujumchisi Lionel Messiga yillik maoshi 35 million yevroga teng yangi shartnoma taklif qilmoqchi. Bu haqda “TASS” xabar bermoqda.
AS nashrining yozishicha, argentinalik 29 yoshli futbolchi 2018-yilgacha mo‘ljallangan amaldagi kelishuviga ko‘ra kataloniyaliklar safida yiliga 24 million yevro oladi.
Ammo joriy mavsumda uning yillik maoshi 29 million qilib belgilangan. “Barselona” rahbariyati Messining soliq xizmati oldidagi qarzini to‘lashni o‘z zimmasiga olgan.
Bir necha kuni avval Messining otasi Xorxe o‘g‘lining kataloniyaliklar bilan shartnomasini muhokama qilish uchun Ispaniyaga kelgani haqida xabar qilingan edi. Bungacha Xorxe Messi “PSJ” sport direktori Patrik Klyuyvert bilan muzokara o‘tkazgan.
Ilgariroq “Manchester Siti” Messini sotib olish uchun 230 million yevro to‘lashga tayyor ekani haqida xabar berilgan edi.
Bundan tashqari, “Manchester Yunayted” klubi va uning texnik homiysi Adidas Messi “Barselona” bilan kelishuv muddatini yangilamasligi uchun unga 100 million yevro to‘lashga tayyorligi haqida xabarlar paydo bo‘lgan edi.
O‘z navbatida “Barselona” rahbariyati Messiga faoliyatining oxirigacha mo‘ljallangan shartnoma taklif qilishi ma’lum qilingan edi.
Ma’lumot uchun, Lionel Messi 13 yoshligida “Barselona”ga kelib qo‘shilgan. “Ko‘k-anor ranglilar” safida u 8 karra Ispaniya chempioni, to‘rt karra mamlakat Kubogi sohibi, 4 bora YChL g‘olibi bo‘lgan.Bundan tashqari, argentinalik futbolchi dunyodagi yilning eng yaxshi futbolchisiga beriladigan “Oltin to‘p” mukofotining 5 karra sovrindori sanaladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)