Испаниянинг «Барселона» футбол клуби раҳбарияти жамоа ҳужумчиси Лионель Мессига йиллик маоши 35 миллион еврога тенг янги шартнома таклиф қилмоқчи. Бу ҳақда «ТАСС» хабар бермоқда.
AS нашрининг ёзишича, аргентиналик 29 ёшли футболчи 2018 йилгача мўлжалланган амалдаги келишувига кўра каталонияликлар сафида йилига 24 миллион евро олади.
Аммо жорий мавсумда унинг йиллик маоши 29 миллион қилиб белгиланган. «Барселона» раҳбарияти Мессининг солиқ хизмати олдидаги қарзини тўлашни ўз зиммасига олган.
Бир неча куни аввал Мессининг отаси Хорхе ўғлининг каталонияликлар билан шартномасини муҳокама қилиш учун Испанияга келгани ҳақида хабар қилинган эди. Бунгача Хорхе Месси «ПСЖ» спорт директори Патрик Клюйверт билан музокара ўтказган.
Илгарироқ «Манчестер Сити» Мессини сотиб олиш учун 230 миллион евро тўлашга тайёр экани ҳақида хабар берилган эди.
Бундан ташқари, «Манчестер Юнайтед» клуби ва унинг техник ҳомийси Adidas Месси «Барселона» билан келишув муддатини янгиламаслиги учун унга 100 миллион евро тўлашга тайёрлиги ҳақида хабарлар пайдо бўлган эди.
Ўз навбатида «Барселона» раҳбарияти Мессига фаолиятининг охиригача мўлжалланган шартнома таклиф қилиши маълум қилинган эди.
Маълумот учун, Лионель Месси 13 ёшлигида «Барселона»га келиб қўшилган. «Кўк-анор ранглилар» сафида у 8 карра Испания чемпиони, тўрт карра мамлакат Кубоги соҳиби, 4 бора ЕЧЛ ғолиби бўлган.Бундан ташқари, аргентиналик футболчи дунёдаги йилнинг энг яхши футболчисига бериладиган «Олтин тўп» мукофотининг 5 карра совриндори саналади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)