Qozog‘iston fuqarosi Rossiya tarkibiga kirishga da’vat qilgani uchun 5,5 yil qamoq jazosiga hukm qilindi

Shimoliy Qozog‘iston viloyati fuqarosi ijtimoiy tarmoqlarda millatlararo nifoqni yoygani va Rossiya tarkibiga kirishga da’vat qilgani uchun qamoq jazosiga hukm qilindi. Bu haqda TJournal xabar bermoqda.

Igor Chupringa nisbatan Qozog‘iston Jinoyat kodeksining “Mamlakat yaxlitligi, hududlari daxlsizligini buzishga targ‘ibot qilish” va “Axborot-kommunikatsiya tarmoqlaridan foydalanib, millatlararo nifoqni uyg‘otishga qaratilgan qasddan harakatlar” moddalari bo‘yicha jinoiy ish qo‘zg‘aldi.

Sud materiallariga ko‘ra, viloyatning Qizil jar tumani, Sokolovka qishlog‘ida yashovchi Chuprin 2014-yil 1-sentabridan 2015-yil 20-mayga qadar “VKontakte” ijtimoiy tarmog‘ida qozoq millatiga mansub kishilarga nafratidan dalolat beruvchi turli yozuv va izohlar qoldirgan. U aybdor deb topildi hamda 5 yil va 6 oyga ozodlikdan mahrum etildi.

Shuningdek, Chuprinning shaxsiy sahifasida izohlar qoldirgan boshqa foydalanuvchilarga nisbatan sudgacha bo‘lgan tergov olib borilmoqda.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.