Шимолий Қозоғистон вилояти фуқароси ижтимоий тармоқларда миллатлараро нифоқни ёйгани ва Россия таркибига киришга даъват қилгани учун қамоқ жазосига ҳукм қилинди. Бу ҳақда TJournal хабар бермоқда.
Игорь Чупринга нисбатан Қозоғистон Жиноят кодексининг «Мамлакат яхлитлиги, ҳудудлари дахлсизлигини бузишга тарғибот қилиш» ва «Ахборот-коммуникация тармоқларидан фойдаланиб, миллатлараро нифоқни уйғотишга қаратилган қасддан ҳаракатлар» моддалари бўйича жиноий иш қўзғалди.
Суд материалларига кўра, вилоятнинг Қизил жар тумани, Соколовка қишлоғида яшовчи Чуприн 2014 йил 1 сентябридан 2015 йил 20 майга қадар «ВКонтакте» ижтимоий тармоғида қозоқ миллатига мансуб кишиларга нафратидан далолат берувчи турли ёзув ва изоҳлар қолдирган. У айбдор деб топилди ҳамда 5 йил ва 6 ойга озодликдан маҳрум этилди.
Шунингдек, Чуприннинг шахсий саҳифасида изоҳлар қолдирган бошқа фойдаланувчиларга нисбатан судгача бўлган тергов олиб борилмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)