Kolumbiya osmonlarida halokatga uchragan “Shapekoense” futbolchilari xotirasi uchun mashhur rassomlar o‘zlarining kichik, ammo qalblarni titratuvchi asarlarini namoyish etdi.
O‘zining quvnoq rasmlari bilan mashhur bo‘lgan Omar Momani birinchilardan bo‘lib osmonda sokin parvoz etayotgan samolyotni aks ettirdi. U “Shapekoense” uchun qadrli bo‘lgan forma tusini olgan bo‘lib, quyosh balqib turgan yorug‘lik tomon intilayotgandi.
Yana bir rasmda klub futbolchilari aks etgan bo‘lib, ularning yuzi shaffof tus olgan. Bu esa “Shapekoense” yigitlari endi oramizda yo‘q, degan ma’noni bildirsa ajab emas.
Kopa Sudamerikana finali uchun yo‘l olayotgan “Shapekoense” halokatga uchrab, hal qiluvchi bellashuvda ishtirok eta olmagandi. Ularni taqdirlash marosimi osmonning o‘zida o‘tayotgani ham har qanday futbol muxlisi qalbini o‘rtantiradi.
Finalda “Shapekoense”ga qarshi o‘ynashi kerak bo‘lgan “Atletiko Nasyonal” futbol klubi kubokni raqibiga berib yuborishi haqida ma’lum qilib, bu bilan qalbi yarimta bo‘lib qolgan jamoa muxlislariga o‘ziga xos dalda bo‘lgandi. Quyidagi rasmda “Atletiko Nasyonal” va’da qilingan kubokni “Shapekoense” futbolchilari xotirlangan qabristonga olib kelayotgani aks etgan.
1949-yil Italiyaning “Torino”, 1958-yil esa Angliyaning “Manchester Yunayted” futbol klublari ham samolyot halokatiga duchor bo‘lganini ko‘pchilik yaxshi biladi. Allaqachon osmonga parvoz etgan o‘sha futbolchilarning “Shapekoense” a’zolarini kutib olishi tasvirlangan suratni tomosha qiling.
Braziliyaning quyi ligasidan sekin-asta yuqoriga qarab intilgan va tez orada o‘zini A seriyada ko‘rgan “Shapekoense”, xalqaro maydonda ham nom qoldirish uchun harakat qilayotgandi. Ammo Kopa Sudamerikana kubogiga bir qadam qolganida jamoa futbolchilari dunyodan ketdi. Shu tariqa sovrin ularning porloq xotirasi uchun ataldi.
“Atletiko Nasyonal” ramzi bo‘lgan arslon finalda raqib bo‘lgan “Shapekoense” futbolchisiga o‘zi orziqib kutgan kubokni chin dildan taqdim etmoqda.
So‘nggi rasmda “Shapekoense” futbolchilari bulutlar ustida to‘p surayotgani aks etgan. Boqiylik darvozasi oldida esa ularni yaqindagina hayot bilan vidolashgan futbol afsonalari kutib turibdi. Gollandiyalik Yoxan Kruiff hamda braziliyalik Karlos Albertoni tanigan bo‘lsangiz kerak...
Izoh (0)