Shveysariya adliya vazirligi va politsiyasi Xalqaro futbol federatsiyasi (FIFA) sobiq bosh kotibi Urs Linsining uyida tintuv o‘tkazdi. Tintuv 2005-yil aprelida Adidas kompaniyasining o‘sha paytdagi rahbari Robert Lui-Dreyfus tomonidan Germaniya futbol ittifoqiga 6,7 million yevro o‘tkazib berilishi yuzasidan ochilgan ish bilan bog‘liq. Bu haqda mamlakat federal prokuraturasi ma’lum qildi, deya xabar beradi “TASS”.
Sentabr boshida Shveysariya bosh prokuraturasi Frans Bekkenbauerga nisbatan u “Germaniya—2006” qo‘mitasi rahbari bo‘lib turgan paytda mablag‘dan o‘rinsiz foydalanish va noqonuniy boyishda gumon qilib, tergov boshlagani bildirilgandi.
Ma’lumotlarga ko‘ra, Lui-Dreyfus Bekkenbauer va Germaniya futbol ittifoqi sobiq rahbari Volfgang Nirsbax rahbarlari bo‘lgan “Germaniya—2006” qo‘mitasi hisob raqamiga 10,3 million Shveysariya franki (6,7 mln yevro atrofida) o‘tkazib bergan. Olingan mablag‘ qo‘mita ehtiyojlari uchun ishlatilishi lozim bo‘lgan, biroq hech bir hisobot yoki soliq deklaratsiyalarida o‘z aksini topmagan.
Qator manbalar taxminicha, pullar ovozlarni sotib olish uchun sarflangan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)