Angliya futbol assotsiatsiyasi (FA) mamlakat terma jamoasi sardori, “Manchester Yunayted” klubi hujumchisi Ueyn Runini Ispaniya terma jamoasi bilan o‘rtoqlik o‘yini arafasida ichkilikbozlik kechasida ishtirok etgani uchun jazolamaslikka qaror qildi. Bu haqda “TASS” xabar bermoqda.
Runi Angliya termasining Ispaniyaga qarshi 2:2 hisobida yakunlangan o‘rtoqlik o‘yinida maydonga tushmadi. “Uch sherlar” bosh murabbiyi vazifasini bajaruvchi Garet Sautgeyt hujumchi tizza jarohati tufayli maydonga tusha olmaganini ta’kidlagandi. Biroq Buyuk Britaniya matbuoti Ueyn Runi ichkilikbozlikka berilgani uchun terma jamoa tarkibidan joy olmagani haqida xabar bergan.
Ta’kidlanishicha, angliyalik futbolchi terma jamoa joylashgan mehmonxonaning barida bo‘lib o‘tgan kechada ishtirok etgan. Uning suratlari ijtimoiy tarmoqlarda tarqalib ketgach, 16-noyabr kuni 31 yoshli futbolchi rasman uzr so‘ragan.
FA hodisa yuzasidan tekshiruv o‘tkazilishi ma’lum qilingan bayonot tarqatgandi. Shuningdek, assotsiatsiya terma jamoada o‘yinchilarning kechki payt mehmonxonadan chiqishiga taqiq joriy etadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)