Mutlaq jangchilik chempionati (UFC)ning yengil vazndagi chempioni irlandiyalik Konor Makgregor AQShning Kaliforniya shtatida bokschilik litsenziyasini oldi. Bu haqda, MMA Fighting portaliga tayanib, “TASS” xabar bermoqda.
“Konor haqiqatdan ham litsenziya oldi. Shu damdan buyon u Kaliforniyada bokschi bo‘ldi. Endilikda Makgregor o‘ziga munosib raqib topishi kerak”, – dedi Kaliforniya atletlari komissiyasi ijrochi direktori Endi Foster.
Avvalroq professional ringda mag‘lubiyatga uchramagan hamda faoliyatini yakunlagan AQShlik bokschi kichik Floyd Meyvezer Konor Makgregor bilan boks qoidalariga ko‘ra jang qilish istagi borligi haqida ma’lum qilgan edi. Bunga javoban irlandiyalik jangchi Meyvezer bilan boks qoidalariga muvofiq jang o‘tkazish uchun 100 million dollar so‘ragandi.
Konor Makgregor 13-noyabr kuni UFC’ning yengil vazn toifasida Eddi Alvaresni mag‘lubiyatga uchratib, ikki vazn toifasida UFC chempioni bo‘lgan ilk jangchiga aylangan edi. Bunga qadar u 2015-yilning dekabr oyida Joze Aldoni nokautga uchratib, yarim yengil vazn toifasida UFC chempionlik kamarini himoya qilgandi.
Biroq 27-noyabr kuni Konor Makgregor Joze Aldoga qarshi majburiy jang o‘tkazishdan bosh tortgani uchun yarim yengil vazn toifasida jahon chempioni unvonidan mahrum etildi.
Ma’lumot uchun, 28 yoshli Makgregor faoliyatini 2008 yilda boshlagan. Shu vaqtgacha u 23 ta jang o‘tkazib, 20 tasida (17 tasida nokaut bilan) zafar quchgan va 3 tasida mag‘lubiyatga uchragan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)