Janubiy Koreya prezidentining ma’muriyati mamlakat yetakchisining ixtiyoriy iste’fosini talab qilmoqda

Koreya Respublikasi prezidenti Pak Kin Xening ma’muriyati parlamentni mamlakat yetakchisining ixtiyoriy iste’fosiga tayyorgarlik bo‘yicha partiyalararo muzokaralarni boshlashga chaqirdi. Bu haqda uning rasmiy vakili Chjun Yon Gun ma’lum qildi, deb yozadi “TASS”.

“Milliy majlis tez orada muhokamani (prezidentning iste’fo jarayoni va jadvali) boshlashiga umid qilamiz”, — deb ta’kidladi u.

Avvalroq Pak Kin Xe televideniye orqali xalqqa murojaatida o‘z lavozimini tark etishga tayyor ekanligi, faqat buning uchun zarur siyosiy shart-sharoitlar yaratilishi zarurligini ma’lum qilgan edi.

“Parlamentga kelajagimni, jumladan, prezidentlik muddatimni qisqartirishni hal etishni taklif qilaman”, — deya ta’kidladi u.

“Amaldagi partiya va muxolifat boshqaruvni hukumatda tartibsizlik yuzaga kelmaydigan tarzda topshirish choralari haqida kelishuvga erishganda men iste’foga chiqishga tayyor bo‘laman”, — dedi Pak Kin Xe.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.