Amerikaning McDonald’s restoranlari tarmog‘ining o‘ziga xos taomi — “Big Mak” gamburgeri ixtirochisi Jim Delligatti 98 yoshida vafot etdi, deb yozadi “TASS”.
Fast fud sohasidagi novator Pensilvaniya shtati Pittsburg shahri tashqarisida qarindoshlari va yaqinlari davrasida 28-noyabr, dushanbadan 29-noyabr, seshanbaga o‘tar kechasi hayotdan ko‘z yumdi, ammo bu haqda 30-noyabr, chorshanba kunigina e’lon qilindi.
Asl ismi Maykl bo‘lgan, biroq o‘zini Jim deb atashni afzal ko‘rgan Delligatti “Big Mak”ni taxminan 50 yil avval, 1967-yilda ixtiro qilgan. O‘sha vaqtda u franchayzing bitimi bo‘yicha McDonald’s markasi ostida faoliyat yuritgan 47 ta yemakxona xo‘jayini bo‘lgan.
Delligatti tarmoqning standart taomnomasini ikkita gamburger kotleti, pishloq, salat, piyoz, marinadlangan bodring bo‘lgan katta buterbrodlar bilan to‘ldirishga qaror qiladi, ular pirovardida “Big Mak” deb nom oladi.
Dastlab McDonald’s kompaniyasi rahbariyati Jim Delligattining ushbu ixtironi tarmoqning boshqa restoranlariga joriy qilish taklifiga qiziqish bildirmadi. Ammo keyinchalik bu qaror qayta ko‘rib chiqildi va 1968-yildayoq u dastlab AQShning boshqa hududlarida, keyinroq esa butun dunyo bo‘ylab sotila boshladi.
Izoh (0)