«Независимая газета»: Сайлов кампаниясининг ажралиб турувчи хусусияти сифатида президентликка номзодлар ўртасида реал рақобатни кўрсатиш мумкин

Россиянинг «Независимая газета» нашри 28 ноябрь, душанба кунги сонида «Ўзбекистон Президент сайловига тайёргарлик кўрмоқда» номли мақола эълон қилди.

Унда, жумладан, шундай дейилади:

«Ўзбекистондаги президент сайлови муддатидан аввал бўлиб ўтмоқда. Ўзбекистон халқи оғир жудолик — Биринчи Президент Ислом Каримов вафотини бошидан ўтказди. Бироқ жамиятни ислоҳ қилиш стратегияси сақлаб қолинди, ҳокимиятнинг ворисийлик хусусияти таъминланади. Мамлакат фуқароларига кўра, энг асосийси Ўзбекистонда тинчлик-осойишталикни асраш. Респондентларнинг 41,2 фоизи сайловдан нимани кутаётгани ҳақидаги саволга шундай жавоб берган. Сўровда қатнашганларнинг 95 фоизи овоз беришда албатта иштирок этишини билдирган. Улардан 41,3 фоизи буни фуқаролик бурчи, 31,8 фоизи юрт келажаги учун масъулият, 21,3 фоизи эса фикрини билдириш ва муносиб номзодни танлаш имконияти билан изоҳлади.

2016 йилги сайлов кампаниясининг ажралиб турувчи хусусияти сифатида президентликка номзодлар ўртасида реал рақобатни кўрсатиш мумкин. Бунда давлат раҳбарини сайлаш жараёнини тартибга солувчи қатор норматив актлар, хусусан, «Ўзбекистон Республикаси Президенти сайлови тўғрисида», «Фуқароларнинг сайлов ҳуқуқи кафолатлари тўғрисида», «Ўзбекистон Республикаси Марказий сайлов комиссияси тўғрисида» ва бошқа қонунлар қабул қилингани муҳим омил бўлмоқда. 

Халқ томонидан сайланган парламентнинг роли ва масъулияти ошгани ҳақида гапирганда «Парламент назорати тўғрисида»ги қонунни қабул қилинганини алоҳида таъкидлаш лозим. Ҳозирда қонун чиқарувчи орган қўмиталари томонидан ҳукумат аъзолари фаолияти ҳақида ҳисобот берадиган парламент эшитувларини ўтказилиши одатий ҳолга айланди. Қолаверса, 2015 йилда Ўзбекистон Сенати махсус қонун билан прокуратура органлари фаолияти устидан парламент назоратини ўрнатиш ваколатига эга бўлди. 

«Электрон ҳукумат тўғрисида»ги қонун аҳоли ва бизнеснинг давлат идоралари билан интерактив алоқада бўлиши учун имконият яратилишини кўзда тутади. Ҳужжатда халқаро қонунчилик ва АҚШ, Германия, Австрия, Жанубий Кореянинг илғор тажрибаси инобатга олинган. Шунингдек, республика ҳукумати раҳбари фуқаролар ва юридик шахслар мурожаати учун виртуал қабулхона очди. Эндиликда ариза, шикоят ва таклифларни бош вазирга тўғридан-тўғри сайт орқали жўнатиш ёки телефон орқали билдириш мумкин».

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.