2016-yilning iyul oyida Xitoyning “Beytszing Goan” klubi bilan yarim yillik shartnoma imzolagan O‘zbekiston milliy terma jamoasi hujumchisi Igor Sergeyev ortga qaytadi. Bu haqda “Sports.uz” nashri Xitoydagi ishonchli manbalariga tayanib ma’lumot berdi.
Kelishuvga ko‘ra, Sergeyevning o‘yinlari xitoyliklarda yaxshi taassurot qoldirsa, yarim yillik shartnoma uzaytirilishi mumkin edi. Turkiya termasi hujumchisi Burak Yilmaz bilan shartnoma tuzgan va Ueyn Runi kabi futbolchiga shartnoma taklif qilgan “Beytszing Goan” esa Sergeyev bilan hamkorlikni davom ettirishni istamagan. Hujumchi katta ehtimol bilan Toshkentning “Paxtakor” klubiga qaytib keladi.
Ma’lumot uchun, Igor Sergeyev Xitoydagi klubi safida 7 bor asosiy tarkibda va 7 bor zaxiradan maydonga tushib, umumiy hisobda 700 daqiqa to‘p surdi va faqatgina 1 ta gol urdi. O‘zbekistonlik boshqa bir futbolchi — Anzur Ismoilov to‘p suradigan “Chanchung Yatai”ga qarshi gol Sergeyev uchun Xitoydagi yagonasi bo‘lib qoldi.
Igor Sergeyev O‘zbekiston milliy terma jamoasining so‘nggi 8 rasmiy o‘yinida ham raqiblar darvozasiga gol ura olmagan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)