2016 йилнинг июль ойида Хитойнинг «Бейцзинг Гоан» клуби билан ярим йиллик шартнома имзолаган Ўзбекистон миллий терма жамоаси ҳужумчиси Игорь Сергеев ортга қайтади. Бу ҳақда «Sports.uz» нашри Хитойдаги ишончли манбаларига таяниб маълумот берди.
Келишувга кўра, Сергеевнинг ўйинлари хитойликларда яхши таассурот қолдирса, ярим йиллик шартнома узайтирилиши мумкин эди. Туркия термаси ҳужумчиси Бурак Йилмаз билан шартнома тузган ва Уэйн Руни каби футболчига шартнома таклиф қилган «Бейцзинг Гоан» эса Сергеев билан ҳамкорликни давом эттиришни истамаган. Ҳужумчи катта эҳтимол билан Тошкентнинг «Пахтакор» клубига қайтиб келади.
Маълумот учун, Игорь Сергеев Хитойдаги клуби сафида 7 бор асосий таркибда ва 7 бор захирадан майдонга тушиб, умумий ҳисобда 700 дақиқа тўп сурди ва фақатгина 1 та гол урди. Ўзбекистонлик бошқа бир футболчи — Анзур Исмоилов тўп сурадиган «Чанчунг Ятаи»га қарши гол Сергеев учун Хитойдаги ягонаси бўлиб қолди.
Игорь Сергеев Ўзбекистон миллий терма жамоасининг сўнгги 8 расмий ўйинида ҳам рақиблар дарвозасига гол ура олмаган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)