Ўзбекистонда Почта алоқаси хизматларини кўрсатиш қоидаларига ўзгартириш ва қўшимчалар киритилди

Ахборот технологиялари ва коммуникацияларини ривожлантириш вазирининг буйруғи (pdf) билан Почта алоқаси хизматларини кўрсатиш қоидаларига ўзгартириш ва қўшимчалар киритилди, дея хабар бермоқда Norma.

Ҳужжатга мувофиқ, халқаро пул ўтказмаларининг янги классификацияси тасдиқланди. Энди улар юбориш услубига кўра, оддий (почта алоқаси орқали юбориладиган), тезлаштирилган (телекоммуникациялар тармоғи орқали — электрон пул ўтказмалари) ва гибрид (почта алоқаси ва телекоммуникациялар тармоғи орқали) пул ўтказмаларига бўлинади.

Халқаро пул ўтказмалари билан айирбошлаш бўйича хизматни тақдим этиш учун почта алоқасининг тайинланган оператори бошқа мамлакатларнинг почта алоқаси операторлари билан икки томонлама ва кўп томонлама келишувлар тузади. Халқаро пул ўтказмалари билан айирбошлаш Умумжаҳон почта иттифоқи актларига мувофиқ амалга ошади.

Шунингдек, киритилган қўшимчаларга кўра, тезкор почтанинг халқаро жўнатмаларини жўнатиш ва етказиб бериш (топшириш) Умумжаҳон почта иттифоқининг ҳужжатларига мувофиқ EMS тезкор почта тизими бўйича, EMS кўп томонлама намунали келишуви ёки икки томонлама келишувлар асосида амалга оширилади.

Қиймати эълон қилинган посилкалар ва халқаро хатлар, майда пакетлар, мўрт ва катта посилкалар, «Express» (Шахсан топширилсин) белгиси бўлган ёзма хат-хабарлар жўнатмалари ва посилкалар, «Frans de taxes et de droits» (Тарифлар ва йиғимлар ундирмасдан) белгили ёзма хат-хабарлар жўнатмалари ва посилкалар, шунингдек, «A remettre en main proper» (Ўз қўлига топширилсин) белгили қиймати эълон қилинган буюртма жўнатмалари, хатлар ва посилкалар фақат уларни қабул қилиш рухсат этилган мамлакатларга жўнатиш учун қабул қилинади.