Hindistonda poyezd halokatga uchrashi oqibatida 90 kishi qurbon bo‘ldi

Hindistonning Uttar-Pradesh shtati Kanpur shahri yaqinida yo‘lovchi poyezdining 14 ta vagoni relsdan chiqib ketdi, deb yozadi “TASS”. Oqibatda 90 dan ortiq kishi halok bo‘lib, 150 dan ziyodi jarohatlandi.

NDTV telekanali ma’lumotlariga ko‘ra, poyezd xarobalari ostidan 91 kishining jasadi chiqarib olingan. Qutqaruv ishlari davom etmoqda, og‘ir texnika, shu jumladan, avtokranlar jalb qilingan. Hukumat qurbonlar va jabrlanganlar soni ortishidan xavfsiramoqda.

Halokat sabablari aniqlashtirilmoqda, ammo asosiy versiya sifatida hozircha relsning singanligi ko‘rib chiqilmoqda.

Hodisa Kanpur shahridan 100 km masofada Puxrayan stansiyasi yaqinida 20-noyabr kuni 02:30 da sodir bo‘lgan.

Hindiston bosh vaziri Narendra Modi fojia qurbonlari oilalariga o‘z ta’ziyasini izhor etdi.