Eron yaqin bir necha kun ichida mamlakatdan 11 tonnaga yaqin og‘ir suvni chiqarib ketmoqchi, deb yozadi “TASS” The Wall Street Journal’ga tayanib.
Uning ma’lumotlariga ko‘ra, og‘ir suv (D2O — vodorodning izotopi deyteriyning kislorod bilan birikmasi, u yadro reaktorlarida neytronlar tezligini susaytirishda qo‘llaniladi) xalqaro bozorda sotish uchun Ummonga keltiriladi. Ayni paytda u Erondagi portlardan birida turibdi. U chiqarib ketilgach, mamlakatdagi og‘ir suv zaxiralari ruxsat etilgan hajm — 120 tonnagacha kamayadi.
17-noyabr, payshanba kuni Atom energiyasi bo‘yicha xalqaro agentlik (MAGATE) bosh direktori Yukiya Amano agentlikning boshqaruvchilar kengashida Eronni Birgalikdagi keng qamrovli harakatlar rejasi doirasidagi o‘z majburiyatlarini bajarishga bo‘lgan ishonchni poymol qilmaslik uchun og‘ir suv bo‘yicha cheklovdan oshmaslikka chaqirgan edi.
16-yanvar kuni boshlangan yadro kelishuvini amalga oshirish doirasida Eron o‘zidagi ortiqcha og‘ir suvni xalqaro bozorda sotishga majbur.
Izoh (0)