Turkiya prezidenti Rajab Toyyib Erdo‘g‘on mamlakatning Isroildagi elchisi lavozimiga bosh vazirning xalqaro masalalar bo‘yicha maslahatchisi Kamol Okem tanlanganini ma’lum qildi. Bu haqda “TASS” xabar bermoqda.
“Biz bosh vazirning maslahatchisi janob Kamol Okemni Isroildagi elchi qilib tayinladik. Isroil tomoni ham o‘z elchisini tayinladi”, — deya ta’kidladi Turkiya prezidenti.
Isroil 15-noyabr, seshanba kuni Londondagi elchixonasi maslahatchisi va Ozarbayjondagi sobiq elchisi Eytan Naeni Turkiyadagi diplomatik vakolatxona rahbari etib tayinlagani ma’lum bo‘ldi.
Ikki davlatning diplomatik missiyalari 6 yil davomida vaqtinchalik ishonchli vakillar rahbarligi ostida faoliyat ko‘rsatdi. Bu Turkiya va Isroil o‘rtasidagi munosabatlarda yuz bergan tanglik bilan bog‘liq bo‘lgan: 2010-yili Isroil maxsus bo‘linmasi “Moviy Marmara” paromini qo‘lga olgan va mazkur operatsiya chog‘ida Turkiyaning 9 nafar fuqarosi halok bo‘lgandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)