Fransiyada bir yildan beri davom etayotgan favqulodda holat 2017-yil bahorida bo‘lib o‘tadigan prezidentlik saylovigacha uzaytirilishi mumkin. Bu haqda 2015-yil teraktlarini tekshirish bo‘yicha parlament komissiyasi hamraisi Sebastyen Pyetrasanta Le Nouvel Observateur jurnali sahifalarida ma’lum qildi, deb xabar beradi “TASS”.
“Hozirgi vaziyatda hech kim favqulodda holat tartibini bekor qilishga jur’at etmaydi. Kelgusi yil yanvarida u kamida prezidentlik saylovigacha uzaytirilishiga ishonchim komil”, — dedi Pyetrasanta.
Mamlakatdagi favqulodda holat tartibi 2015-yil, 13-noyabrdagi Parijdagi teraktlardan so‘ng uch oy muddatga joriy etilgandi. Biroq rasmiylar terrorchilik xavfi yuqori bo‘lgani sababli mazkur tartibni bir necha bor uzaytirdi. Nitssada yuz bergan navbatdagi teraktdan so‘ng esa favqulodda holat biryo‘la olti oy — 2017-yil yanvarining oxirigacha uzaytirildi.
Ma’lumot uchun, Fransiyada prezidentlik saylovi kelgusi yil aprelida bo‘lib o‘tadi.
Izoh (0)