Xalqaro jamoatchilikni O‘zbekistonda Prezident saylovlariga tayyorgarlik, milliy saylov tizimi, nomzodlarning tarjimai holi va dasturlari bilan tanishtirish maqsadida mamlakatning xorijdagi elchixonalarida turli tadbirlar, jumladan, brifinglar, konferensiyalar, davra suhbatlari va seminarlar o‘tkazilmoqda. Bu haqda “Daryo”ga O‘zbekiston TIV matbuot xizmati ma’lum qildi.
Bunday tadbirlarda O‘zbekistonga xalqaro kuzatuvchilar sifatida taklif etilgan ekspertlar ham ishtirok etmoqda. Jumladan, CLAAS kompaniyasi mustaqil maslahatchisi Udo Folker bo‘lajak saylovlar nafaqat O‘zbekiston, balki butun Markaziy Osiyo siyosiy hayotida muhim voqea bo‘lishi, zero, mamlakat mintaqada barqarorlikni saqlash o‘chog‘i ekanligini bildirdi.
— O‘zbekistonda 2014-yili parlament saylovlarida ishtirok etganim tajribasidan kelib chiqib ishonch bilan ayta olamanki, mamlakat prezidentlik saylovlarini ham yuksak darajada o‘tkazadi. Nomzodlar, siyosiy partiyalar, uchastka saylov komissiyalari uchun zarur barcha sharoitlar yaratilgan, — deya ta’kidladi Germaniya—O‘zbekiston do‘stlik jamiyati vitse-prezidenti Diyeter Brandenburger.
Shanxay ijtimoiy fanlar akademiyasi vakillari Yuy Sinxue va Li Ixay, Shanxay xalqaro tadqiqotlar universiteti Rossiya va Markaziy Osiyo tadqiqotlari markazi direktor o‘rinbosari Yan Bo respublikada aholi turmush sharoitini yaxshilash, tadbirkorlar faoliyatini osonlashtirish, ular uchun qulay sharoitlar yaratish, ishbilarmonlik muhitini takomillashtirishga qaratilgan o‘zgarishlar yuz berayotganini e’tirof etdi.
Shanxay xalqaro tadqiqotlar universiteti vakili Szyan Fen va Sharqiy Xitoy siyosatshunoslik universiteti prorektori Lin Yanpin aholisi milliarddan ziyod mamlakat nomidan 13 nafar kuzatuvchi tarkibida bo‘lajak saylovlarda qatnashish ular uchun katta sharaf va mas’uliyat ekanligini qayd etdi. Ularning ta’kidlashicha, delegatsiyaning barcha a’zolari siyosiy partiyalar nomzodlarining saylovoldi dasturlari bilan tanishishga ulgurdi. Mazkur dasturlarda iqtisodiyotga investitsiyalar jalb etish, aholi bandligini ta’minlash, agrar sektorni rivojlantirish, qishloqdagi turmush tarzini yaxshilash, kommunal xizmatlar narxini maqbullashtirish kabi ko‘plab dolzarb masalalar qamrab olinganiga e’tibor qaratildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)