O‘zbekiston Respublikasi prezidentligiga O‘zbekiston XDPdan ko‘rsatilgan nomzod Hotamjon Ketmonovning Jizzax viloyatidagi saylovchilar bilan uchrashuvi bo‘lib o‘tdi. “Jizzax” maxsus industrial zonasi ma’muriy binosi konferensiyalar zalida bo‘lib o‘tgan uchrashuv bir vaqtning o‘zida viloyatning barcha tumanlaridagi saylovchilar bilan video-konferensiya shaklida tashkil etildi. Bu haqda partiya matbuot xizmati xabar bermoqda.
Tadbirni xalq deputatlari Jizzax viloyat kengashi deputati, Jizzax tumani transport va sanoat kasb-hunar kolleji direktori Quraqboy Ergashev ochdi va olib bordi. Nomzodning ishonchli vakili Nosir Siddiqov so‘z olib, Hotamjon Ketmonovning tarjimai holi bilan yig‘ilganlarni tanishtirdi. Shundan so‘ng so‘z O‘zbekiston Respublikasi Prezidentligiga nomzodga berildi.
Nomzod o‘z dasturida ilgari surayotgan budjet mablag‘lari, ayniqsa, ijtimoiy sohaga yo‘naltiriladigan mablag‘larning maqsadli ravishda sarflanishi ustidan qat’iy nazoratni kuchaytirish, davlatning o‘sib borayotgan iqtisodiy imkoniyatlaridan aholining barcha qatlamlari, eng avvalo, kam ta’minlangan qatlamining turmush darajasini yaxshilashda foydalanish, zamonaviy texnika va texnologiyalardan foydalanish asosida xo‘jalik yurituvchi subyektlar tomonidan ishlab chiqarilayotgan tovarlar va xizmatlar sifatini oshirish, tannarxini pasaytirish, ularning eksport imkoniyatlarini kengaytiruvchi va aholining xarid qobiliyatini oshirishga xizmat qiluvchi raqobat muhitini shakllantirish masalalariga e’tiborni kuchaytirish haqida to‘xtaldi.
Shuningdek, to‘g‘ridan-to‘g‘ri chet el investitsiyalarini jalb qilish orqali zamonaviy texnika va texnologiyalarga asoslangan ishlab chiqarishni tashkil etishga qaratilgan chora-tadbirlar ishlab chiqish zarurligini ta’kidladi.
Ma’ruza yuzasidan bir qator ishtirokchilar so‘zga chiqdilar. Ular o‘z chiqishlarida nomzod dasturida ilgari surilayotgan davlat mulkini xususiylashtirishdan olinadigan mablag‘larning bir qismini turar-joy fondini shakllantirishga yo‘naltirish mexanizmini takomillashtirish, ijtimoiy obyektlarda nogironlarga maxsus kirish yo‘lagi — panduslar hamda ularga moslashtirilgan piyodalar yo‘lakchalari bo‘lishini ta’minlash, mavjud barcha bino va inshootlarni nogironlar kira olishi nuqtai nazaridan xatlovdan o‘tkazish, yo‘lakchalarni nogironlarga moslash bo‘yicha maxsus davlat dasturini qabul qilish masalalarini qo‘llab-quvvatladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)