Халқаро экспертлар Ўзбекистонда президентлик сайловлари юксак даражада ўтказилишига ишонч билдирмоқда

Халқаро жамоатчиликни Ўзбекистонда Президент сайловларига тайёргарлик, миллий сайлов тизими, номзодларнинг таржимаи ҳоли ва дастурлари билан таништириш мақсадида мамлакатнинг хориждаги элчихоналарида турли тадбирлар, жумладан, брифинглар, конференциялар, давра суҳбатлари ва семинарлар ўтказилмоқда. Бу ҳақда «Дарё»га Ўзбекистон ТИВ матбуот хизмати маълум қилди.

Бундай тадбирларда Ўзбекистонга халқаро кузатувчилар сифатида таклиф этилган экспертлар ҳам иштирок этмоқда. Жумладан, CLAAS компанияси мустақил маслаҳатчиси Удо Фолькер бўлажак сайловлар нафақат Ўзбекистон, балки бутун Марказий Осиё сиёсий ҳаётида муҳим воқеа бўлиши, зеро, мамлакат минтақада барқарорликни сақлаш ўчоғи эканлигини билдирди.

— Ўзбекистонда 2014 йили парламент сайловларида иштирок этганим тажрибасидан келиб чиқиб ишонч билан айта оламанки, мамлакат президентлик сайловларини ҳам юксак даражада ўтказади. Номзодлар, сиёсий партиялар, участка сайлов комиссиялари учун зарур барча шароитлар яратилган, — дея таъкидлади Германия—Ўзбекистон дўстлик жамияти вице-президенти Диетер Бранденбургер.

Шанхай ижтимоий фанлар академияси вакиллари Юй Синхуэ ва Ли Ихай, Шанхай халқаро тадқиқотлар университети Россия ва Марказий Осиё тадқиқотлари маркази директор ўринбосари Ян Бо республикада аҳоли турмуш шароитини яхшилаш, тадбиркорлар фаолиятини осонлаштириш, улар учун қулай шароитлар яратиш, ишбилармонлик муҳитини такомиллаштиришга қаратилган ўзгаришлар юз бераётганини эътироф этди.

Шанхай халқаро тадқиқотлар университети вакили Цзян Фэн ва Шарқий Хитой сиёсацҳунослик университети проректори Лин Янпин аҳолиси миллиарддан зиёд мамлакат номидан 13 нафар кузатувчи таркибида бўлажак сайловларда қатнашиш улар учун катта шараф ва масъулият эканлигини қайд этди. Уларнинг таъкидлашича, делегациянинг барча аъзолари сиёсий партиялар номзодларининг сайловолди дастурлари билан танишишга улгурди. Мазкур дастурларда иқтисодиётга инвестициялар жалб этиш, аҳоли бандлигини таъминлаш, аграр секторни ривожлантириш, қишлоқдаги турмуш тарзини яхшилаш, коммунал хизматлар нархини мақбуллаштириш каби кўплаб долзарб масалалар қамраб олинганига эътибор қаратилди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.