Bugun, 5-noyabr kuni “Toshkent” xalqaro aeroportiga “O‘zbekiston havo yo‘llari” milliy aviakompaniyasi tomonidan xarid qilingan ikkinchi Boeing-787 Dreamliner samolyoti yetib keldi. Bu haqda jurnalist Navbahor Karimova Facebook’dagi sahifasi orqali ma’lum qildi.
“Yangi Boeing-787 Dreamliner samolyotini kutib olish marosimi. Ajoyib”, — deb yozdi u sahifasida.
Samolyot shanba kuni ertalab Sietldan boshlanadigan 12 soatlik uzluksiz parvozdan so‘ng “Toshkent” xalqaro aeroportida qo‘nishi ilgariroq xabar qilingan edi. Avialaynerni kutib olish marosimida OAV vakillari, aeroport ishchilari va boshqalar ishtirok etdi.
Birinchi Dreamliner Toshkentga 31-avgust kuni yetib kelgan edi. O‘shandan buyon layner O‘zbekiston shaharlariga, shuningdek, Olmaota, Dubay va boshqa xorijiy shaharlarga parvoz qildi.
350 o‘rinli samolyotlar uzoq va juda uzoq masofali parvozlarda qo‘llanadi.
Bundan tashqari, milliy aviakompaniya yana uchta Boeing Dreamliner xarid qilishi ma’lum bo‘ldi.
Izoh (0)