1985 йили National Geographic журнали муқовасида эълон қилинган «Афғон қизи» (Шарбат Гула) суратининг муаллифи, америкалик фотосуратчи Стив Маккари Покистонда Шарбат Гуланинг ҳибсга олинганини инсон ҳуқуқларининг қўпол равишда бузилиши деб баҳолади. Бу ҳақда «Интерфакс» хабар бермоқда.
«Мен маъмурият вакилларининг бундай ҳаракатларига қаршиман. У бутун ҳаёти давомида азият чеккан ва унинг ҳибсга олиниши — инсон ҳуқуқларининг қўпол равишда бузилишидир», — деб ёзди Маккари Instagram’даги саҳифасида қолдирган хабарда.
Маккарининг айтишича, у Гуланинг ҳибсга олинганини Покистоннинг Пешовар шаҳрида истиқомат қилувчи дўстидан билган.
«Мен у ва унинг оиласини юридик ва моддий жиҳатдан қўллаб-қувватлаш учун қўлимдан келганини қилишга тайёрман», — дейди фотосуратчи.
Аввалроқ Шарбат Гула қалбаки ҳужжатлар сабаб Покистонда ҳибсга олингани, у 14 йилгача озодликдан маҳрум этилиши мумкинлиги ҳақида хабарлар пайдо бўлган эди.
Гула 1985 йили, унинг сурати National Geographic журнали муқовасида босилиб чиққанидан сўнг машҳур бўлиб кетган. Ўша вақтда у Афғонистондаги қочоқлар лагерида яшар эди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)