Alisher Navoiy nomidagi Toshkent davlat o‘zbek tili va adabiyoti universiteti rektori Shuhrat Sirojiddinov nima uchun hali ham lotin yozuviga asoslangan o‘zbek alifbosiga to‘liq o‘tilmagani haqidagi savolga javob qaytardi. Rektorning javobi “Oila davrasida” gazetasi tomonidan e’lon qilingan.
“Lotin yozuviga asoslangan o‘zbek alifbosiga to‘liq o‘tishning muddati 2010-yilning 1-sentabri etib belgilangan. Hozirgacha maktabgacha ta’lim, o‘rta ta’lim va oliy ta’limda bu alifboga o‘tib bo‘lindi. Ammo katta yoshdagilar orasida mazkur alifbo ham, kirill alifbosi ham qo‘llanib kelinmoqda. Lekin buning jiddiy tashvishga sabab bo‘ladigan joyi yo‘q”, — dedi universitet rektori.
“Ilgari, yaqin o‘tmishimizda kirill alifbosiga o‘tish o‘sha davr siyosatiga ko‘ra, birdaniga amalga oshirilgan, hammaning birdaniga kirill alifbosiga o‘tishi majburiyat qilib qo‘yilgan. Bunda katta yoshdagilar muayyan qiyinchiliklarga ro‘baro‘ bo‘lgan. Bugun bunday yo‘l tutish unchalik ham maqsadga muvofiq emas, albatta”, — deb hisoblaydi Shuhrat Sirojiddinov.
“Alohida ta’kidlash lozimki, bir alifbodagi harflarning qanday tovushni ifodalashini bilishning o‘zi hali bu yozuvni to‘liq egallab bo‘lganini bildirmaydi. Odamda yangi alifboda yozilgan so‘zni harflab emas, balki butunicha, yaxlitligicha o‘qiy olish ko‘nikmasi shakllangandagina bu alifbo o‘rganib bo‘lingan hisoblanadi”, — deya qo‘shimcha qildi rektor.
Ma’lumot uchun, lotin yozuviga asoslangan o‘zbek alifbosini joriy etish to‘g‘risidagi qonun 1993-yil 2-sentabr kuni qabul qilingan. O‘zbekiston parlamentining maxsus qarori bo‘yicha, lotin alifbosiga bosqichma-bosqich o‘tish 2010-yilning 1-sentabriga qadar to‘liq yakunlanishi belgilangan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)