Tailand hukumati Kambodjani kecha, 28-iyul kuni e’lon qilingan tinchlik sulhiga qaramay, qurolli to‘qnashuvlarni davom ettirishda aybladi. Bu holat kelishuvdan atigi bir necha soat o‘tib yuz berdi. Bu haqda The Guardian xabar berdi.
Tailand qirollik armiyasi vakili, general-mayor Vintxay Suvareening ma’lum qilishicha, Kambodja kechasi bir nechta hududlarda Tailandga hujum qilgan. Unga ko‘ra, bu harakatlar kelishuvga “qasddan putur yetkazish va o‘zaro ishonchni buzishga urinish” sifatida baholangan.
“Biz sulh e’lon qilinganidan so‘ng harakatlarni to‘xtatdik. Biroq Kambodjaning hujumlariga javob qaytarishga to‘g‘ri keldi. Tailand hech qanday bosqinchilik qilmadi, faqat xalqaro me’yorlarga ko‘ra hududiy daxlsizlikni himoya qildi”, dedi Suvaree.
Kambodja bosh vaziri Xun Manet esa bugun, 29-iyul kuni Facebook’da joylagan postida “soat 00:00 dan keyin front chizig‘ida vaziyat yumshaganini” ta’kidlagan. AFP muxbirining xabar berishicha, chegaradan 20 km uzoqlikdagi Samrong shahrida soat 23:30 dan boshlab portlashlar to‘xtagan va tonggacha tinchlik saqlangan.
Sulhga rioya qilinishi kerakligi borasida BMT bosh kotibi Antoniu Guterrish ham chiqish qilib, tomonlarni kelishuvni to‘liq bajarishga va uzoq muddatli tinchlikka yo‘l ochishga chaqirgan. Shunga qaramay, Tailand rasmiylari chegaraga yaqin hududlardagi fuqarolarga hali uylariga qaytmaslikni tavsiya qildi. Ayrimlar ushbu tinchlik tashabbusiga umid bilan qarayotgan bo‘lsa, boshqalar hali ehtiyotkorona yondashmoqda. Chegara bo‘yicha qo‘shma qo‘mita navbatdagi uchrashuvni 4-avgust kuni Kambodjada o‘tkazishi kutilmoqda.
Ma’lumot uchun, 28-iyul kuni Malayziyada o‘tgan tinchlik muzokaralarida ikki tomon “shartsiz va zudlik bilan” o‘t ochishni to‘xtatishga kelishgandi. So‘nggi ziddiyatlar oxirgi o‘n yillikdagi eng yirik to‘qnashuvlardan biri bo‘lib, hozirgacha 38 kishi halok bo‘lib, 300 mingdan ortiq odam evakuatsiya qilingan.
Izoh (0)