Xitoyning mashhur maishiy texnika ishlab chiqaruvchisi Haier kompaniyasi o‘zining ilk odamsimon roboti — HIVA Haiwa’ni taqdim etdi. Kompaniya ushbu robotni “uy ishlari terminatori” deb atamoqda. U sun’iy intellekt bilan jihozlangan bo‘lib, bir qator maishiy vazifalarni mustaqil ravishda bajara oladi.
165 santimetr bo‘y va 70 kilogrammli mazkur robot 44 ta mexanik harakatlarni mustaqil bajara oladi. Shu sababli u insonlarga xos egiluvchan tarzda harakatlana oladi. HIVA Haiwa 2 metrgacha bo‘lgan balandlikdagi buyumlarga osongina yetib borishi, xonada erkin harakatlanishi va bir nechta uy ishlarini bajara olishi bilan ajralib turadi.
U g‘ildirakli platformada harakatlanib, pol yuvish, chang artish, ovqat tayyorlash, kir yuvish mashinasini boshqarish, kiyimlarni dazmollash va yig‘ishtirish kabi ko‘plab yumushlarni bajaradi. Haier vakillarining ta’kidlashicha, hozircha robotni masofadan boshqarish mumkin, ammo yaqin yillarda “uy terminatori”ga mustaqil harakatlanish tizimi joriy etiladi va robot avtomatik tarzda berilgan vazifalarni bajara oladi.
Mazkur gumanoid birinchi marta 2025-yil bahorida Xitoyda bo‘lib o‘tgan AWE (Appliance & Electronics World Expo) xalqaro ko‘rgazmasida namoyish etildi. Haier robototexnika sohasida ilgari ham bir nechta mahsulotlar yaratgan edi, ammo HIVA Haiwa kompaniya uchun odamsimon robotlar bozoridagi ilk jiddiy qadam bo‘ldi.
Rasmiy ma’lumotlarga ko‘ra, Haier dunyo bo‘yicha SCARA tipidagi robotlar ishlab chiqarish bo‘yicha to‘rtinchi, Xitoyda esa ikkinchi o‘rinda turadi. Kompaniya yaqinda Shenjenda joylashgan Step Electric kompaniyasini sotib olish niyatini bildirgan bo‘lib, bu kelgusida robototexnika bozoridagi mavqeyini yanada mustahkamlashi mumkin.
Haier robotlar bozoriga kirib kelgan yagona yirik kompaniya emas. Xuddi shu sohada Midea, Changhong, Gree va boshqa yirik texnika brendlari ham o‘z insonsimon robotlarini ishlab chiqmoqda. Bu esa Xitoyda yirik “robot poygasi” boshlanganidan dalolat beradi.
Bundan avval tadbirkor Ilon Mask ham Tesla kompaniyasi o‘zining Optimus V3 robotini ishlab chiqishi haqida aytgan edi. Maskning so‘zlariga ko‘ra, ushbu model 2025-yil oxiriga qadar tayyor bo‘ladi.
Izoh (0)