Toshkentdagi Simpoziumlar saroyida Islom hamkorlik tashkiloti tashqi ishlar vazirlari kengashining 43-sessiyasi boshlandi. Bu haqda O‘zA xabar bermoqda.
Tashqi ishlar vazirlari kengashi Islom hamkorlik tashkilotining eng muhim tuzilmalaridan biri bo‘lib, uning sessiyasi har yili a’zo mamlakatlardan birida o‘tkaziladi. 2015-yili Al-Kuvayt shahrida bo‘lgan 42-sessiyada navbatdagi sessiyani Toshkent shahrida o‘tkazish to‘g‘risida qaror qabul qilingandi.
Sessiyada Islom hamkorlik tashkilotiga a’zo davlatlar tashqi ishlar vazirlari, tashkilotning yordamchi va maxsus muassasalari rahbarlari, AQSh, Fransiya, Buyuk Britaniya, Shveysariya, Italiyaning IHTdagi maxsus vakillari hamda BMT, YXHT, Arab davlatlari ligasi, Iqtisodiy hamkorlik tashkiloti, Osiyoda hamkorlik va ishonch choralari bo‘yicha kengash kabi qator tuzilmalar vakillari ishtirok etmoqda.
Sessiyani Islom hamkorlik tashkiloti tashqi ishlar vazirlari kengashining amaldagi raisi, Kuvayt bosh vazirining birinchi o‘rinbosari, tashqi ishlar vaziri shayx Saboh Xolid al-Hamad as-Saboh kirish so‘zi bilan ochdi.
Qur’on tilovat qilindi. Birinchi Prezident Islom Karimov vafoti munosabati bilan O‘zbekiston xalqiga chuqur ta’ziya izhor etildi.
O‘zbekiston Respublikasi Prezidenti vazifasini bajaruvchi Shavkat Mirziyoyev sessiyaning ochilish marosimida nutq so‘zladi.
Islom hamkorlik tashkiloti Bosh kotibi Iyad Amin Madaniy sessiyaga yuksak darajada tayyorgarlik ko‘rilganini qayd etib, O‘zbekiston hukumatiga samimiy minnatdorlik bildirdi.
Sessiya Islom Karimov taklif etgan “Ta’lim va ma’rifat – tinchlik va bunyodkorlik sari yo‘l” shiori ostida o‘tmoqda. Anjuman ishtirokchilari mazkur g‘oya Islom hamkorlik tashkilotining ustuvor maqsadlariga mos ekanini ta’kidladi.
IHT tashqi ishlar vazirlari kengashi 43-sessiyasining yalpi majlisida Kot-d’Ivuar Respublikasi tashqi ishlar vaziri Abdalla Mabri, Afg‘oniston Islom Respublikasi tashqi ishlar vaziri Salohuddin Rabboniy, Sudan Respublikasining Saudiya Arabistonidagi elchisi Ali Alsanosiy, O‘zbekiston Respublikasi oliy va o‘rta maxsus ta’lim vaziri Rustam Qosimov so‘zga chiqdi.
Tashqi ishlar vazirlari kengashining amaldagi raisi Kuvayt o‘z raislik vakolatini O‘zbekistonga topshirdi. O‘zbekiston Respublikasi tashqi ishlar vaziri mazkur organning 2017-yildagi navbatdagi sessiyasiga qadar Islom hamkorlik tashkiloti tashqi ishlar vazirlari kengashiga raislik qiladi.
Izoh (0)