O‘zbekistonning AQShdagi elchixonasida “O‘zbekiston taraqqiyot yo‘lida: strategik izchillik va an’analarga sodiqlik” mavzusida brifing bo‘lib o‘tdi. Unda Kongress, Davlat departamenti, savdo ishlari vazirligi, AQSh ishbilarmonlik, akademik va ekpert doiralari, shuningdek, xalqaro tashkilotlar — Xalqaro valyuta jamg‘armasi va Jahon banki vakillari ishtirok etdi. Bu haqda “Jahon” axborot agentligi xabar bermoqda.
Tadbir chog‘ida uning qatnashchilari taraqqiyotning o‘zbek modeli izchil amalga oshirilishi, O‘zbekistonning mintaqada tinchlik, barqarorlik va xavfsizlikni ta’milashdagi o‘rniga baho berdi.
— Siyosiy kampaniyalarda AQSh Respublikachilar partiyasi delegati sifatida ishtirok etish tajribasiga egaman. Mazkur tadbir O‘zbekistonning bugungi kundagi rivoji, shuningdek, bo‘lajak prezidentlik saylovlariga tayyorgarlik borasida amalga oshirilayotgan ishlar bilan yaqindan tanishish imkonini berdi, — deya ta’kidladi Yevrosiyo biznesi koalitsiyasining global biznesni rivojlantirish masalalari bo‘yicha vitse-prezidenti Ralf Vinni.
— Biz O‘zbekiston bilan 12 yildan beri hamkorlik qilib kelmoqdamiz, — deya ma’lum qildi AQShning “Ochiq dunyo” markazi dasturlar menejeri Luis Madanik. — Ma’lumotlarga to‘liq ushbu brifing uchun minnatdorchilik bildirishni istardim. Unda mamlakatning bugungi kuni, jumladan, demokratik standartlarga muvofiq prezidentlik saylovlari o‘tkazish yuzasidan ko‘rilayotgan choralar haqida batafsil axborot taqdim etildi. O‘zbekistonning mintaqada tinchlik va xavfsizlikni ta’minlashdagi o‘rniga yuksak baho beraman, harbiy mojarolarga qo‘shilmaslik, turli bloklarga a’zo bo‘lmaslik maqomiga sodiq qolib kelayotganini qadrlayman.
Izoh (0)