Yevroittifoq Afg‘onistonga 1,2 milliard yevro miqdorida yordam ko‘rsatadi va Bryusselda 5-oktabr, chorshanba kuni ikkinchi hamda asosiy ishchi kuni boshlangan donorlar konferensiyasida o‘z sheriklaridan shunday xayriya ko‘magini kutadi. Bu haqda Yevroittifoqning xorijiy ishlar va xavfsizlik siyosati bo‘yicha oliy vakili Federika Mogerini ma’lum qildi, deya xabar beradi “TASS”.
“Yevroittifoq Afg‘onistonga 1,2 milliard yevro ajratishga qaror qildi. Boshqa sheriklarimizdan ham shu kabi majburiyatlar olinishi haqida eshitishni istardim. Mazkur konferensiya nafaqat moliyaviy yordamni ta’minlash, balki Afg‘onistonga siyosiy ko‘mak ko‘rsatish istiqbollarini muhokama etishga qaratilgan. Ushbu mamlakatda xavfsizlikni ta’minlash uning tiklanishi uchun hal qiluvchi ahamiyatga ega”, — deya ta’kidladi Mogerini.
Oliy vakil Yevroittifoq tomonidan tashkil etilgan Afg‘oniston bo‘yicha ikki kunlik konferensiyada dunyoning 70 davlati va 30 tashkilotidan 100 dan ortiq delegatsiya ishtirok etayotganini qayd etdi.
Izoh (0)