Toshkentda sinxron suzish bo‘yicha xalqaro turnir yakunlandi

Toshkentda sinxron suzish bo‘yicha “Suv parisi” xalqaro turniri yakunlandi. Bu haqda O‘zA xabar bermoqda.

Madaniyat va sport ishlari vazirligi, Milliy olimpiya qo‘mitasi va suzish federatsiyasi tomonidan o‘tkazilgan musobaqada o‘nga yaqin davlatdan yuzdan ortiq sportchi g‘oliblik uchun bahslashdi.

Xalqaro turnirda sportchilar uch yosh toifasida (16–18, 13–15, 12 va undan kichik) solo, duet va guruh bahslarida o‘z mahoratini namoyish etdi.

Turnirning solo bahslarida toshkentlik Ziyoda Toshxo‘jayeva, duet bahslarida Anastasiya Ro‘zmetova va Gulsanam Yo‘ldosheva juftligi o‘z yosh toifasidagi musobaqalarda g‘oliblikni qo‘lga kiritdi. Guruh bahslarida Toshkent shahri, Andijon va Buxoro viloyatlari jamoalari shohsupaga ko‘tarildi.

Shuningdek, Rossiya, Belarus, Ukraina, Vengriya, Slovakiya, Isroil va KXDR sportchilari ham sovrinli o‘rinlarni egalladi.