Misr qirg‘oqlarida noqonuniy muhojirlar o‘tirgan kema halokatga uchrashi natijasida qurbon bo‘lganlar soni 51 kishiga yetdi, deya xabar bermoqda “TASS” mamlakat sog‘liqni saqlash vazirligiga tayanib.
Noqonuniy muhojirlar bilan liq to‘la qayiq 21-sentabr kuni Misrning Buxeyra provinsiyasi Rashid shahri yaqinida O‘rtayer dengizida cho‘kib ketgan edi. Dastlab bortda Sudan, Suriya, Somali, Eritreya va Misr fuqarolaridan iborat 300 ga yaqin kishi bo‘lgani xabar qilindi.
Misr harbiy-dengiz kuchlari mahalliy baliqchilar yordamida hozirgacha 160 dan ortiq kishini suvdan tirik holda chiqarib olishga muvaffaq bo‘ldi, 100 ga yaqin kishi bedarak yo‘qolgan deb hisoblanmoqda. Ammo ba’zi ma’lumotlarga ko‘ra, kemada qariyb 600 yo‘lovchi bo‘lgan, bedarak yo‘qolganlar soni esa 200 dan oshishi mumkin.
Avvalroq Misr bosh prokuraturasi cho‘kib ketgan kema ekipajining to‘rt a’zosini hibsga olishni buyurgani, yana to‘qqiz gumonlanuvchi qidiruvga berilgani xabar qilingan edi. Tirik qolganlar so‘zlab berishicha, odamlarni noqonuniy ravishda Yevropaga yuborish bilan shug‘ullanuvchi kimsalar turli provinsiyalardagi muhojirlarning har biridan 2 ming dollarga yaqin mablag‘ olib, ularni sohil bo‘yiga to‘plagan. So‘ng noqonuniy muhojirlarni Italiya qirg‘oqlariga jo‘nashi kerak bo‘lgan qayiqqa ortishgan, ammo haddan tashqari ortiqcha yuk tufayli, u dengizga g‘arq bo‘lgan.
Izoh (0)