Dehli bo‘lajak Rossiya—Pokiston harbiy mashg‘ulotlari yuzasidan Moskva bilan bog‘landi va bu mashg‘ulotlar Hindiston hududiy yaxlitligiga zarar yetkazmasligi haqida va’dalarni oldi. Bu haqda Hindistonning Rossiyadagi elchisi Pankarj Saran ma’lum qildi, deya xabar beradi “Interfaks”.
“Biz Rossiya rasmiylari bilan bog‘landik va ularga Hindiston hamda Rossiya o‘rtasidagi munosabatlarga nechog‘li katta ahamiyat berishimiz haqidagi fikrlarimizni yetkazdik. Rossiya hukumati mamlakatimiz uchun og‘riqli bo‘lgan masalalar, jumladan, uning hududiy yaxlitligiga chuqur hurmat bilan yondoshishini bildirdi va Rossiya Hindiston milliy xavfsizligi manfaatlariga ziyon yetkazmasligiga ishontirdi”, — deya ta’kidladi elchi.
Ma’lumot uchun, 24-sentabr kuni Pokistonning tog‘li hududlarida Rossiya va Pokistonning “Do‘stlik—2016” deb nomlangan ilk hamkorlikdagi harbiy mashqlari boshlanadi.
Izoh (0)